الماتىدا كولىك جۇكتەمەسىن ەسكەرە وتىرىپ، كوممۋنالدىق تۇراقتاردى تاريفتەۋدىڭ جاڭا جۇيەسى ۇسىنىلىپ وتىر. بۇل تۋرالى قالا اكىمدىگى حابارلادى، دەپ جازادى infohub.kz سايتى.
جوبا تۇرعىندارعا تۇراق ورىندارىنىڭ قولجەتىمدىلىگىن ارتتىرىپ، كوشە-جول جەلىسىنىڭ ەڭ سۇرانىسقا يە ۋچاسكەلەرىندەگى كەپتەلىستى ازايتۋعا باعىتتالعان.
ايتا كەتەيىك، كوممۋنالدىق اقىلى تۇراقتارداعى ساعاتىنا 100 تەڭگەلىك قولدانىستاعى تاريف 2016 جىلدان بەرى وزگەرمەگەن جانە 10 جىل بويى قايتا قارالماعان. وسى ۋاقىت ىشىندە الماتى قالاسىندا جۇرەتىن كولىك سانى 1 ملن بىرلىكتەن اسىپ، جولدار مەن تۇراق كەڭىستىگىنە سالماق ايتارلىقتاي ارتقان.
الماتى قالاسىنىڭ جول قوزعالىسىن ۇيىمداستىرۋ جانە جولاۋشىلار كولىگى باسقارماسىنىڭ باسشىسى ەرجان ديحانبايەۆ ءبىرىڭعاي تاريف ءوزىنىڭ نەگىزگى مىندەتىن — تۇراق ورىندارىنىڭ اينالىمىن قامتاماسىز ەتىپ، اسىرەسە قالانىڭ ورتالىق بولىگىندە بوس تۇراقتاردىڭ بولۋىن — ورىنداۋدان قالعانىن اتاپ ءوتتى. ونىڭ ايتۋىنشا، سونىڭ سالدارىنان جۇرگىزۋشىلەر بوس ورىن ىزدەۋگە كوبىرەك ۋاقىت جۇمساۋعا ءماجبۇر بولىپ، بۇل ساپارلار سانىنىڭ ارتۋىنا جانە جول جەلىسىنە قوسىمشا سالماق تۇسۋىنە اكەلەدى.
بۇل ماسەلەنى شەشۋ ءۇشىن تۇراق قۇنى ناقتى اۋماقتىڭ كولىك جۇكتەمەسى مەن فۋنكسيونالدىق ماقساتىنا بايلانىستى بولاتىن ديففەرەنسيالدى تاريفتەۋ جۇيەسىن ەنگىزۋ ۇسىنىلىپ وتىر.
«جوبا بويىنشا كولىك جۇكتەمەسى سالىستىرمالى تۇردە تومەن ۋچاسكەلەر ءۇشىن تاريف ساعاتىنا 100 تەڭگە دەڭگەيىندە ساقتالادى. تۇراق كەڭىستىگىن پايدالانۋ قارقىندىلىعى ورتاشا اۋماقتار ءۇشىن ساعاتىنا 150 تەڭگە بولادى. ال تۇراق ورىندارى تاپشى، قوزعالىسى قارقىندى ايماقتار ءۇشىن ساعاتىنا 200 تەڭگە»، — دەپ حابارلادى ۆەدومستۆو.
سونىمەن قاتار تۇرعىندار ءۇشىن قولدانىستاعى جەڭىلدىكتەر ساقتالادى. اكىمدىك ەسكە سالعانداي، بۇرىن الماتىدا جول قوزعالىسىن ۇيىمداستىرۋ قاعيدالارى (جول قوزعالىسى قاعيدالارىمەن رەتتەلمەگەن بولىگىندە) بەكىتىلگەن. وعان سايكەس اقىلى تۇراقتار ايماعىندا تۇراتىن تۇرعىن ءۇي يەلەرى ارنايى رۇقسات راسىمدەپ، ءوز تۇرعىلىقتى جەرىنە جاقىن تاڭداعان تۇراقتا تەگىن پايدالانا الادى. سونداي-اق پايدالانۋشىلاردىڭ ءبىرقاتار ساناتى ءۇشىن جەڭىلدىكتەر قولدانىلادى. بۇل شارا جەرگىلىكتى تۇرعىنداردىڭ مۇددەسىن ەسكەرىپ، ولارعا تۇراق كەڭىستىگىن پايدالانۋدىڭ قولايلى جاعدايىن جاسايدى.
جوبانى ازىرلەۋشىلەردىڭ پىكىرىنشە، ۇسىنىلىپ وتىرعان وزگەرىستەر تۇراق كەڭىستىگىن تيىمدىرەك باسقارۋعا باعىتتالعان.
جوبانى ىسكە اسىرۋ ەكىنشى قاتارعا تۇراق قويۋ جاعدايلارىن ازايتىپ، بوس ورىن ىزدەۋ ۋاقىتىن قىسقارتىپ، قالانىڭ ورتالىق بولىگىنە تۇسەتىن كولىك سالماعىن ازايتىپ، بارلىق جول قوزعالىسىنا قاتىسۋشىلار ءۇشىن قولايلى جاعداي جاسايدى دەپ كۇتىلۋدە.