وتكەن جۇمادا الماتىدا تاريحي ءسات ورىن الدى: ات ۇستىندەگى كۇرەس تۇرىنەن وتكەن Qasqyr Cup دەبيۋتتىك مەدياتۋرنيرىنىڭ الاڭىندا العاش رەت ايەلدەر كۇش سىناستى، دەپ حابارلايدى infohub.kz سايتى.
اۋدارىسپاق جارىسىندا اتقا بوپاي اتىمەن تانىمال جاۋىنگەر قىز زامزاگۇل فايزوللانوۆا مەن توميريس دەپ اتالاتىن گۇلمارال ەركەباەۆا ءمىندى. ايتا كەتەيىك، ەكەۋى دە كۇش قۇرىلىمدارىندا — قورعانىس مينيسترلىگى مەن ىشكى ىستەر مينيسترلىگىندە قىزمەت ەتەدى. ەركەباەۆا — ءىىم اعا لەيتەنانتى، ال فايزوللانوۆا كاپيتان شەنىندە جانە قورعانىس مينيسترلىگىنىڭ ورتالىق اسكەري سپورت كلۋبىنىڭ سپورت كوميتەتىندە وكىلدىك ەتەدى.
اۋدارىسپاق ءداستۇرلى تۇردە ەرلەر سپورتى جانە قاتال سپورت ءتۇرى سانالادى. بۇعان دەيىن قىزدار قازاق كۇرەسى مەن ەركىن كۇرەستە دە بىرنەشە رەت كەزدەسىپ، ولاردىڭ اراسىنداعى ەسەپ تەڭ بولعان.
وسى بەلدەسۋدىڭ جەڭىمپازى ەركەباەۆا اتاندى. سوڭعى سەكۋندتاردا ول قارسىلاسىن اتتان ج ۇلىپ ءتۇسىردى.
«بۇعان دەيىن دە اتقا مىنگەنىمىزبەن، ەر ۇستىندە كۇرەسۋ ءۇشىن رۋح كەرەك ەكەن. ءبىر جاعىنان، اتتى باسقارۋ كەرەك، ەكىنشى جاعىنان، اداممەن كۇرەسۋ كەرەك. كۇش — قولدىڭ كۇشىندە ەمەس، جۇرەكتە. ءبىز قازاق قىزدارىنىڭ رۋحى مەن مىنەزىن كورسەتتىك»، — دەدى ەركەباەۆا.
ونىڭ ايتۋىنشا، قىزدار تۋرنيرگە جارىس الدىندا عانا دايىندالا باستاعان.
Qasqyr Cup ءتۋرنيرى 2 قازاندا ءوتتى. ول اۋدارىسپاقتى كەڭ اۋديتورياعا ناسيحاتتاۋ ماقساتىندا ۇيىمداستىرىلدى. جارقىن شوۋ وتاندىق بلوگەرلەر مەن اكتەرلەر قاۋىمىنىڭ ءتۇسىن جينادى.
تۋرنير جەڭىمپازى جانە Asar-Ume قورىنىڭ باسشىسى اسحات نۇرماشيەۆ ءىس-شارا بارىسىندا تالعارداعى مۇقتاج كوپبالالى وتباسىنا جاڭا ءۇيدىڭ كىلتىن تابىس ەتتى.
ۇيىمداستىرۋشىلار جينالعاندارعا ۇلتتىق سپورتتى قولداعانى ءۇشىن العىس ايتىپ، Qasqyr Cup-تى جالعاستىرۋ جوسپارلارىن مالىمدەدى. بولاشاقتا جارىستار ۇلكەن ستاديونداردا ءوتۋى مۇمكىن.
بۇعان دەيىن Kursiv LifeStyle الماتىدا بلوگەرلەر، ارتىستەر مەن مەديا تۇلعالار قاتىسقان العاشقى Qasqyr Cup اۋدارىسپاق ءتۋرنيرى وتكەنىن جازعان بولاتىن. جارىستىڭ ەڭ كۇتپەگەن ساتتەرىنىڭ ءبىرى نيگەريالىق قاتىسۋشى مۇحاممادتىڭ جەڭىسى بولدى.