الماتىدا №7 قالالىق كلينيكالىق اۋرۋحانانىڭ دارىگەرلەرى توعىزىنشى قاباتتان قۇلاپ، اۋىر جاراقات العان 34 جاستاعى ايەلدى ومىرگە قايتاردى. ناۋقاستى مۋلتيديسيپلينارلىق ماماندار توبىنىڭ ۇيلەسىمدى ارەكەتىنىڭ ارقاسىندا وتە اۋىر جاعدايدان الىپ شىعۋ مۇمكىن بولدى. ونى ونىنشى كۇنى وڭالتۋ شارالارىمەن امبۋلاتوريالىق ەمگە شىعاردى، دەپ حابارلايدى infohub.kz سايتى.
الماتى قوعامدىق دەنساۋلىق ساقتاۋ باسقارماسىنىڭ مالىمەتىنشە، ايەل اۋىر ارالاس جاراقاتپەن اۋرۋحاناعا شۇعىل تۇردە جەتكىزىلگەن. دارىگەرلەر مي-باس سۇيەك جاراقاتىن، كەۋدە قۋىسىنىڭ اۋىر جاراقاتىن، قابىرعالاردىڭ كوپتەگەن سىنۋىن، پنەۆموتوراكس پەن گەموتوراكستى، سونداي-اق جامباس سۇيەكتەرىنىڭ، ورتان جىلىكتەردىڭ جانە توقپان جىلىكتىڭ سىنۋىن انىقتادى. ناۋقاستىڭ جاعدايى وتە اۋىر دەپ باعالاندى: كوما جانە ءولىم ءقاۋپى جوعارى تراۆماتيكالىق شوك. جەدەل جاردەم كولىگىندە-اق بريگادا ينتۋباسيا جاساپ، شوكقا قارسى تەراپيانى باستادى. ستاسيونارعا تۇسكەننەن كەيىن بىرنەشە مينۋت ىشىندە پاسيەنتكە قابىلداۋ بولىمىندە بارلىق قاجەتتى شۇعىل كومەك كورسەتىلدى.
الماتى №7 قالالىق كلينيكالىق اۋرۋحاناسىنىڭ ديرەكتورى نۇردوس قادىربەكوۆتىڭ ايتۋىنشا، ەمدەۋگە بىرنەشە باعىتتاعى ماماندار قاتىستى. «ەمدەۋگە انەستەزيولوگ-رەانيماتولوگتار، تراۆماتولوگتار، نەيروحيرۋرگتەر، حيرۋرگتەر، تەراپەۆتەر، كارديولوگتار، پسيحولوگتار مەن پسيحياترلار قاتىستى. پاسيەنتكە بارلىق مەديسينالىق كومەك ءمامس جۇيەسى اياسىندا كورسەتىلدى»، — دەدى نۇردوس قادىربەكوۆ.
№7 قالالىق كلينيكالىق اۋرۋحاناسىنىڭ پوليتراۆما بولىمشەسىنىڭ مەڭگەرۋشىسى رامازان اسكەروۆ ايەلگە بىرنەشە وپەراسيا جاسالعانىن اتاپ ءوتتى: اياق-قولدارىنا، ال ەكى كۇننەن كەيىن جامباس سۇيەكتەرىنە. «بارلىق كەزەڭدەردە ترومبوەمبوليا جانە مايلى ەمبوليا سياقتى اسقىنۋ ءقاۋپى وتە جوعارى بولدى. دەگەنمەن، ءپانارالىق ءتاسىلدىڭ، كوماندالىق جۇمىستىڭ جانە دۇرىس ەمدەۋ تاكتيكاسىنىڭ ارقاسىندا وڭ ناتيجەگە قول جەتكىزە الدىق»، — دەدى دارىگەر. جەتىنشى كۇنى ناۋقاس اياعىنان تۇرعىزىلدى، ال ونىنشى كۇنى قاناعاتتانارلىق جاعدايدا ۇيىنە شىعارىلدى.