الماتىدا «جىبەك جولى» ستانسياسىنان اۋەجايعا دەيىنگى مەتروپوليتەننىڭ ەكىنشى جەلىسىنىڭ جوبالاۋ-سمەتالىق قۇجاتتاماسىن ازىرلەۋگە 150 ملن تەڭگە باعىتتاۋ جوسپارلانىپ وتىر. بۇل تۋرالى قالالىق ءماسليحات وتىرىسىندا الماتى قالاسىنىڭ ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆ مالىمدەدى، دەپ حابارلايدى infohub.kz سايتى.
ونىڭ ايتۋىنشا، جىل سوڭىنا دەيىن «قالقامان» ستانسياسىن پايدالانۋعا بەرۋ جوسپارلانعان. ونى ىسكە قوسۋ جۇمىستارىنا 1،1 ملرد تەڭگە ءبولىنىپ وتىر.
«سونىمەن قاتار بيىل «قالقامان» ستانسياسىنان «بارلىق» ستانسياسىنا دەيىنگى ۋچاسكەنىڭ قۇرىلىسى باستالدى. جوبانى جۇزەگە اسىرۋعا جەرگىلىكتى بيۋدجەتتەن 243،3 ملن تەڭگە قاراستىرىلعان، تاعى 45 ملرد تەڭگە ينفراقۇرىلىمدى دامىتۋ قورىنان ءبولىندى. مەتروپوليتەن جەلىسىن ودان ءارى كەڭەيتۋ ءۇشىن «جىبەك جولى» ستانسياسىنان اۋەجايعا دەيىنگى ەكىنشى جەلىنىڭ جوبالاۋ-سمەتالىق قۇجاتتاماسىن ازىرلەۋگە 150 ملن تەڭگە قاراستىرىلعان»، — دەدى باسقارما باسشىسى.
ول مەترونى دامىتۋمەن قاتار راديالدى باعىتتاردى، ىشكى كولىك بايلانىستارىن جانە شاعىن اۋدانداردىڭ جول جەلىسىن دامىتۋ جۇمىستارى جالعاسىپ جاتقانىن اتاپ ءوتتى.
ماسەلەن، رىسقۇلوۆ داڭعىلىنىڭ قالا شەكاراسىنا دەيىنگى قۇرىلىسىن اياقتاۋعا 5 ملرد تەڭگە باعىتتالادى. مۇقانوۆ كوشەسىن گوگول كوشەسىنەن رايىمبەك داڭعىلىنا دەيىن ۇزارتۋعا 500 ملن تەڭگە، ال رايىمبەك داڭعىلىن شىعىس اينالما اۆتوموبيل جولىنا (شااج) دەيىن ۇزارتۋعا 5 ملرد تەڭگە بولىنەدى.
«شاعىن اۋدانداردىڭ جول ينفراقۇرىلىمى دا داميتىن بولادى. جىل سوڭىنا دەيىن اقجار شاعىن اۋدانىنداعى جول قۇرىلىسىن اياقتاۋعا 2،7 ملرد تەڭگە، تەرەكتى شاعىن اۋدانىنداعى جول جۇمىستارىنا 650 ملن تەڭگە باعىتتالادى. قوعامدىق كولىكتىڭ تۇراقتى جۇمىسىن قامتاماسىز ەتۋ ءۇشىن قوسىمشا 12 ملرد تەڭگە سۋبسيديالاۋعا بولىنەدى. ونىڭ 10 ملرد تەڭگەسى اۆتوبۋس تاسىمالىنا، 2 ملرد تەڭگەسى مەتروپوليتەن تاسىمالىنا قاراستىرىلعان»، — دەدى سپيكەر.