الماتى وبلىسىندا قۇقىق قورعاۋ ورگاندارى تىيىم سالىنعان دىني-ەكسترەميستىك «حيزب ۋت-تاحرير» ۇيىمىنىڭ ۇياشىعىن اشكەرەلەدى. بۇل تۋرالى infohub.kz سايتى حابارلايدى.
NUR.KZ اگەنتتىگى وبلىستىق ءدىن ىستەرى باسقارماسىنا سىلتەمە جاساپ حابارلاعانداي، اقپارات ۆەدومستۆونىڭ Instagram-داعى رەسمي پاراقشاسىندا جاريالانعان. ەڭبەكشىقازاق اۋدانىنىڭ شەلەك اۋىلىندا ۋاكىلەتتى ورگانداردىڭ ۇيلەستىرۋىمەن پوليسيا قىزمەتكەرلەرى قازاقستان اۋماعىندا تىيىم سالىنعان «حيزب ۋت-تاحرير» دىني-ەكسترەميستىك ۇيىمىنىڭ قىزمەتىنە قاتىسى بار دەپ كۇدىكتەلگەن ادامدارعا قاتىستى شارالار كەشەنىن وتكىزدى. ۇياشىققا 25 جەرگىلىكتى تۇرعىن تارتىلعان.
كۇدىكتىلەردىڭ تۇرعان جەرلەرىندە سانكسيالانعان ءتىنتۋ جانە جەكە ءتىنتۋ بارىسىندا ەلەكتروندىق قۇرىلعىلار مەن ءدىني مازمۇنداعى ماتەريالدار تابىلىپ، تاركىلەندى. تاركىلەنگەندەر قاتارىندا: 11 سمارتفون، 93 كىتاپ، 16 بروشيۋرا، 2 داپتەر، سونداي-اق ءدىني سيپاتتاعى جازبالارى بار بلوكنوت.
قازىرگى تاڭدا وسى فاكتى بويىنشا سوتقا دەيىنگى تەرگەپ-تەكسەرۋ اياسىندا قاجەتتى تەرگەۋ جانە پروسەستىك ارەكەتتەر جۇرگىزىلۋدە. بولعان وقيعانىڭ بارلىق ءمان-جايى انىقتالىپ، تاركىلەنگەن ادەبيەت پەن ەلەكتروندىق ماتەريالدار زەردەلەنۋدە، سونداي-اق ادامداردىڭ تىيىم سالىنعان ۇيىم قىزمەتىنە قاتىسۋ دارەجەسى بەلگىلەنۋدە. وتكىزىلگەن شارالاردىڭ ناتيجەسى بويىنشا كۇدىكتىلەردىڭ ارەكەتىنە ءتيىستى قۇقىقتىق باعا بەرىلەدى.