الماتى وبلىسىنداعى ەكى اۋىلدىڭ تۇرعىندارى جەردىڭ جەكە مەنشىككە بەرىلۋىنەن مال جايىلىمنان جانە سۋعا قول جەتكىزۋدەن ايىرىلدى. بۇل تۋرالى infohub.kz سايتى حابارلايدى.
Astana TV تەلەارناسىنىڭ مالىمەتىنشە، جاعداي ۇزىناعاش جانە جاڭاقۇرىلىس اۋىلدارىندا ورىن العان. تۇرعىندار كوپ جىلدار بويى قاراسۋ وزەنىنىڭ جاعاسىندا مال جايىپ كەلگەن. الايدا شامامەن 10 جىل بۇرىن جەكە ۇيلەر سالىنا باستاپ، سۋعا بارار جول قورشاۋلارمەن بوگەلگەن. ەندى تۇرعىندار مالدى جايىلىمعا شىعارۋ ءۇشىن بىرنەشە شاقىرىم جەرگە كەتۋگە ءماجبۇر.
«مال جايۋ بىلاي تۇرسىن، ونى سۋعا دا اپارا المايمىز. 10 جىلدان استام ۋاقىت وسىندا 300-دەن استام مال جايدىم. ءقازىر 40-50 سيىردى سۋعا اپارا الماي وتىرمىز. وسى ماسەلەمەن 10 جىلداي ابىگەرلەنىپ ءجۇرمىز»، — دەدى جاڭاقۇرىلىس اۋىلىنىڭ تۇرعىنى جومارت اپەتايەۆ.
سۋ كودەكسىنە سايكەس، سۋ قورعاۋ بەلدەۋىنىڭ ەڭ از ەنى 35 مەتردى قۇرايدى. الايدا ءقازىر قورشاۋلار وزەنگە تىكەلەي تاقاپ تۇر. تۇرعىندار بۇل ماسەلە بويىنشا جىل سايىن اكىمدىككە جۇگىنەتىنىن، ءبىراق شارا قولدانىلماي وتىرعانىن ايتادى.
«جەر ۋچاسكەلەرى كونكۋرستىق نەگىزدە بەرىلگەندە، دايىندىق جۇمىستارى جۇرگىزىلگەندە سۋ قورعاۋ ايماعىنىڭ نورمالارى، مال ايدايتىن جولاقتار ەسكەرىلگەن. ال ءقازىر قورشاپ الۋ داۋلى ماسەلە تۋدىرىپ وتىر. بۇل — جەر يەسىنىڭ جاۋاپكەرشىلىگى. ياعني ول نورمالاردى ەسكەرمەي قورشاپ العان»، — دەدى ۇزىناعاش اۋىلدىق وكرۋگى اكىمدىگى اپپاراتىنىڭ باس مامانى ءاليا ابۋوۆا.
اكىمدىكتە زاڭسىز قورشاۋلاردى جويۋ جۇمىستارى جۇرگىزىلىپ جاتقانىن مالىمدەدى. ەگەر يەلەرىمەن كەلىسىمگە كەلۋ مۇمكىن بولماسا، بيلىك سۋ قورعاۋ ايماعىن بوساتۋ ءۇشىن سوتقا جۇگىنەتىن بولادى.