الماتى اگلومەراسياسىندا بارلىعى 5 100 وقۋشى ورنىنا ەسەپتەلگەن بەس جاڭا مەكتەپ سالۋ جوسپارلانۋدا. جوبا الماتى وبلىسى مەن الماتى قالاسى اكىمدىكتەرىنىڭ بىرلەسكەن كۇشىمەن جۇزەگە اسىرىلادى. بۇل ورىن تاپشىلىعىن جويۋعا جانە وقۋشىلاردىڭ ماياتنيكتىك كوشى-قونىن ازايتۋعا مۇمكىندىك بەرەدى، دەپ حابارلايدى infohub.kz سايتى.
بۇل تۋرالى الماتى وبلىسىنىڭ اكىمى مارات سۇلتانعازييەۆ «كونستيتۋسيالىق قۇندىلىقتار: كاسىبيلىك، ساپا، ناتيجە» كونفەرەنسياسىندا مالىمدەدى. بىرلەسكەن جوبانىڭ الدىن الا قۇنى شامامەن 41،8 ملرد تەڭگەنى قۇرايدى. وبلىستىق اكىمدىك جەر تەلىمدەرىن انىقتاپ، بارلىق تەحنيكالىق اقپاراتتى الماتى قالاسىنىڭ جوبالىق كەڭسەسىنە تاپسىردى.
بۇل باستامانىڭ باستى ماقساتى — بالالارعا ۇيىنە جاقىن جەردە وقۋعا مۇمكىندىك بەرۋ. قازىرگى ۋاقىتتا وبلىستا تۇراتىن 16 مىڭعا جۋىق بالا كۇن سايىن مەگاپوليستەگى مەكتەپتەرگە وقۋعا بارۋعا ءماجبۇر.
قۇرىلىس كەلەسى ەلدى مەكەندەردە جوسپارلانعان: الاتاۋ قالاسى (جاڭا ءداۋىر شاعىن اۋدانى) — 900 ورىندىق مەكتەپ؛ ىلە اۋدانى (ەكپىندى اۋىلى) — 900 ورىندىق مەكتەپ؛ قاراساي اۋدانى (كوكساي اۋىلى) — 1 200 ورىندىق مەكتەپ؛ قاراساي اۋدانى (قىرعاۋىلدى اۋىلى) — 1 200 ورىندىق مەكتەپ؛ تالعار اۋدانى (تۇزدىباستاۋ اۋىلى) — 900 ورىندىق مەكتەپ.
سونىمەن قاتار، 2026-2027 وقۋ جىلىنا قاراي وڭىردە 4 200 ورىنعا ەسەپتەلگەن «كەلەشەك مەكتەپتەرى» باعدارلاماسى اياسىندا بەس جاڭا مەكتەپ پايدالانۋعا بەرىلەدى. ولار قويانقۇس (الاتاۋ قالاسى)، تىلەندييەۆ (ىلە اۋدانى)، بۇلاقتى (قاراساي اۋدانى) اۋىلدارىندا، سونداي-اق ساتاي جانە اششىساي (ەڭبەكشىقازاق اۋدانى) اۋىلدارىندا اشىلادى. بۇل نىسانداردىڭ ىسكە قوسىلۋى ءۇش مەكتەپتەگى ءۇش اۋىسىمدى وقىتۋ ماسەلەسىن تولىق شەشىپ، تاعى ەكى مەكەمەدەگى ورىن تاپشىلىعىن جويادى. بۇدان باسقا، رەنوۆاسيا باعدارلاماسى اياسىندا كۇردەلى جوندەۋدەن وتكەن تاعى 10 جاڭارتىلعان مەكتەپ ەسىگىن اشادى.
جالپى، 2026-2027 وقۋ جىلىندا وبلىستىڭ 502 مەكتەبىندە 385 مىڭعا جۋىق بالا ءبىلىم الادى، ونىڭ 35 مىڭنان استامى — ءبىرىنشى سىنىپ وقۋشىلارى.
ءوڭىر جوعارى دەموگرافيالىق ءوسىمدى كورسەتىپ وتىر. اكىمدىكتىڭ دەرەكتەرىنە سايكەس، سوڭعى ءتورت جىلدا وبلىستا 75 جاڭا مەكتەپ پەن التى قوسىمشا عيمارات سالىندى. بۇل ءۇش اۋىسىمدى مەكتەپتەر سانىن 52-دەن 23-كە دەيىن قىسقارتۋعا جانە 5،8 مىڭ وقۋشىنى تاسىمالداۋ ماسەلەسىن شەشۋگە مۇمكىندىك بەردى.
2026-2030 جىلدار ارالىعىندا EPC+F مەحانيزمى بويىنشا وبلىستا ەڭ پروبلەمالىق نۇكتەلەردە — وتەگەن باتىر، جايناق، بايسەركە، ا. توقپانوۆ جانە بايتەرەك اۋىلدارىندا تاعى بەس مەكتەپ (4 200 ورىن) سالىنادى. بۇل 7 204 بالانىڭ ءۇش اۋىسىمدى وقۋ ماسەلەسىن شەشۋگە جانە تاعى 2 871 وقۋشىنى تاسىمالداۋ قاجەتتىلىگىن ازايتۋعا مۇمكىندىك بەرەدى.