الماتى وبلىسىندا جول-كولىك وقيعاسى بولىپ، ەكى كامەلەتكە تولماعان بالا زارداپ شەكتى. كولىك جول جيەگىندە وتىرعان بالالاردى قاعىپ، جۇرگىزۋشى وقيعا ورنىنان قاشىپ كەتكەن. كەيىن كۇدىكتىنى انىقتاپ، ۇستاۋ مۇمكىن بولدى، دەپ حابارلايدى infohub.kz سايتى.
وقيعا Telegram-داعى Qumash ارناسىندا جاريالانعان بەينەجازباعا تۇسكەن. ارنانىڭ مالىمەتىنشە، اباي اۋىلىندا Cobalt كولىگىنىڭ جۇرگىزۋشىسى جول جيەگىندە تۇرعان ەكى بالانى قاعىپ كەتكەن.
NUR.KZ تىلشىسىنە الماتى وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى حابارلاعانداي، جاراقات العان ەكى كامەلەتكە تولماعان بالا قاراساي كلينيكالىق كوپبەيىندى ورتالىق اۋداندىق اۋرۋحاناسىنا جەتكىزىلگەن.
«ەكى ناۋقاسقا دا وتا جاسالىپ، وتادان كەيىن انەستەزيولوگيا، رەانيماسيا جانە قارقىندى تەراپيا بولىمىندە بولدى. بۇگىنگى تاڭدا ءبىر ناۋقاس ءارى قاراي ەمدەلۋ ءۇشىن حيرۋرگيا بولىمشەسىنە اۋىستىرىلدى. ەكىنشىسى رەانيماسيادا ەم قابىلداۋدى جالعاستىرۋدا، ونىڭ جاعدايى اۋىر دەپ باعالانۋدا»، — دەدى دارىگەرلەر.
وبلىستىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، كامەلەتكە تولماعانداردى قاعۋ فاكتىسى بويىنشا قىلمىستىق ءىس قوزعالعان. كۇدىكتى انىقتالعان.
«قازىرگى تاڭدا جكو جاساعان سوڭ وقيعا ورنىنان قاشىپ كەتكەن 65 جاستاعى جۇرگىزۋشى ۇستالدى. ول ۋاقىتشا ۇستاۋ يزولياتورىنا قامالدى»، — دەدى پوليسيادا.
قازىرگى ۋاقىتتا وبلىستىق پوليسيا دەپارتامەنتى وقيعانىڭ بارلىق ءمان-جايىن تولىق، جان-جاقتى جانە وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرىن جۇرگىزۋدە.
نازار اۋدارىڭىز! 18+! بەينەجازبادا قاتىگەزدىك كورىنىستەرى بار، ونى كامەلەتكە تولماعاندارعا، پسيحيكاسى تۇراقسىز ادامدارعا جانە جۇكتى ايەلدەرگە قاراۋعا ۇسىنىلمايدى!