الماتىدا ساينا كوشەسىنىڭ رىسقۇلوۆتان تولە بيگە دەيىنگى بولىگىندە جىلدامدىق 60 كم/ساع دەيىن شەكتەلگەنى بەلگىلى بولدى. بۇل تاجىريبە ال-فارابي داڭعىلى مەن ۆواد-تا قولدانىلا ما، قالالىق پوليسيادا ايتىلدى، دەپ حابارلايدى infohub.kz.
الماتى پوليسيا دەپارتامەنتىنىڭ رەسمي وكىلى سالتانات ازىربەك وڭىرلىك كوممۋنيكاسيالار قىزمەتىندەگى بريفينگتە ساينا كوشەسىنىڭ تولە بي مەن رىسقۇلوۆ ارالىعىنداعى ەكى باعىتتا دا پيلوتتىق رەجيمدە جاڭاشىلدىق — جىلدامدىقتى 60 كم/ساع دەيىن شەكتەۋ ەنگىزىلگەنىن ءتۇسىندىردى.
«بۇل تاجىريبەنى بارلىق جەردە قولدانۋ ماسەلەسى ازىرگە قاراستىرىلىپ جاتقان جوق. ءبىز ونى جەكەلەگەن ۋچاسكەدە، اپاتتىلىق دەڭگەيىن ەسكەرە وتىرىپ سىناپ جاتىرمىز. تالداۋ جۇرگىزىلدى. جول-كولىك وقيعالارىنىڭ سانىن ازايتۋ ءۇشىن وسى ءادىستى قولدانامىز. بۇل ۋچاسكەدە سىناق اياقتالمايىنشا، ونى بارلىق جەردە قولدانۋدى جوسپارلاپ وتىرعان جوقپىز. ال قالعان ۋچاسكەلەردە جىلدامدىق رەجيمى وزگەرىسسىز قالدى»، — دەدى سالتانات ازىربەك.
ەسكە سالايىق، بۇعان دەيىن ساينا كوشەسىنىڭ ءبىر ۋچاسكەسىندە جىلدامدىق رەجيمى تومەندەتىلگەنى حابارلانعان بولاتىن. سونداي-اق ۆەدومستۆو قولدانىستاعى جولاقتاردىڭ ەنىن قايتا ءبولۋ ارقىلى ءتورت جولاقتى قوزعالىس ۇيىمداستىرۋعا قول جەتكىزىلگەنىن اتاپ ءوتتى.