الماتىداعى ورتالىق ستاديون ماڭىزدى فۋتبول ماچىنا دايىندالۋدا: 20 تامىزدا «قايرات» ەۋروپا ليگاسىنىڭ پلەي-وفف كەزەڭىندە بەلگيانىڭ «اندەرلەحت» كومانداسىمەن كەزدەسەدى. الايدا ويىن قارساڭىندا وسى ارەنادا وتكەن كانە ۋەستىڭ اۋقىمدى كونسەرتىنەن كەيىن گازوننىڭ جاي-كۇيى تۋرالى ماسەلە تۋىندادى. بەلگىلى بولعانداي، قالپىنا كەلتىرۋ جۇمىستارى قارقىندى ءجۇرىپ جاتىر، دەپ حابارلايدى infohub.kz سايتى.
الماتى سپورت قۇرىلىستارى ديرەكسياسىنىڭ مالىمەتىنشە، شوۋدان كەيىنگى كۇنى، ياعني 16 تامىزدان باستاپ، ستاديوندا دەمونتاج جۇمىستارى باستالدى. سودان كەيىن ماماندار فۋتبول الاڭىنا كۇتىم جاساۋ بويىنشا جوسپارلى اگروتەحنيكالىق ءىس-شارالارعا كىرىستى.
«19 تامىزداعى جاعداي بويىنشا گازوندا شابۋ، اەراسيا جانە تەسۋ، قوسىمشا ەگۋ، قۇم سەبۋ، سونداي-اق كۇندىزگى جانە تۇنگى كۇشەيتىلگەن سۋارۋ جۇمىستارى جۇرگىزىلۋدە. بارلىق جۇمىستار تابيعي جابىننىڭ اعىمداعى جاي-كۇيىن جانە 20 تامىزداعى الداعى فۋتبول ماچىن ەسكەرە وتىرىپ، ءپروفيلدى ماماندارمەن ورىندالۋدا»، — دەدى ديرەكسيادا.
فۋتبول الاڭىنىڭ جاي-كۇيى تۇراقتى باقىلاۋدا ەكەنى اتاپ ءوتىلدى. ماماندار گازوندى ويىنعا دايىنداۋ ءۇشىن قاجەتتى كۇتىم شارالارىنىڭ كەشەنىن جالعاستىرۋدا.