الماتى تاۋلارىندا 73 جاستاعى وڭتۇستىك كورەيا ازاماتى چو كۋكحيدى ىزدەۋ جۇمىستارى ءبىر اپتادان بەرى جالعاسىپ جاتىر. ول جاياۋ سەرۋەنگە شىعىپ، بايلانىسقا شىقپاي قالعان، دەپ حابارلايدى infohub.kz سايتى.
شەتەلدىك ازامات تاۋعا دوستارىمەن بىرگە بارعان. بەلگىلى ءبىر ساتتە ول توپتان وقشاۋلانىپ، كەيىن قوڭىراۋلارعا جاۋاپ بەرمەي قويعان. قۇتقارۋشىلار كىشى الماتى اينالما جولى مەن تالعار اسۋىن تەكسەرىپ شىقتى — ول سوڭعى رەت سوندا كورىنگەن. دوستارىنىڭ ايتۋىنشا، چو كۋكحي سول جەردەن شىڭعا جالعىز كوتەرىلمەك بولعان. ءبىر تاۋلىك وتكەن سوڭ ءتۋريستىڭ جوعالعانى تۋرالى وڭتۇستىك كورەيا ەلشىلىگىنە حابارلانعان.
ىزدەۋ وپەراسياسىنا سەگىز تەحنيكا، جەتى درون، تىكۇشاق جانە قىزمەتتىك يتتەر جۇمىلدىرىلدى.
وقيعاعا بايلانىستى قۇتقارۋشىلار تۋريستەردى تاۋعا جالعىز شىقپاۋعا جانە مارشرۋتتارى تۋرالى تانىستارىنا مىندەتتى تۇردە ايتۋعا شاقىردى.
«ەڭ باستى ەرەجە — قاي جەردە بولساڭىز دا، تۇسكى ساعات بىرگە دەيىن كەرى بۇرىلىپ، قايتۋ كەرەك. تاۋدا تەز قاراڭعى تۇسەدى. سايكەسىنشە، ءسىز جارىق ۋاقىتتاعىداي تاۋلى جەردە باعدار ۇستاي المايسىز. ەكىنشىدەن، قارا ەمەس، اشىق ءتۇستى كيىم كيىڭىز. سەبەبى ىزدەۋ جۇمىستارى كەزىندە قارا كيىمدى ادامدى، اسىرەسە تۇندە تابۋ مۇمكىن ەمەس»، — دەدى «ەرىكتى قۇتقارۋ قىزمەتىنىڭ» جەتەكشىسى قارلىعاش نۇسىربەكوۆا.
بۇعان دەيىن 28 قىركۇيەكتە 73 جاستاعى شەتەلدىك ازامات توپ قۇرامىندا «شىمبۇلاق» اسپالى جولىمەن كوتەرىلىپ، سودان كەيىن ءوز بەتىنشە جولىن جالعاستىرىپ، جوعالىپ كەتكەنى حابارلانعان. ىزدەۋ جۇمىستارى ۇيىمداستىرىلدى. كۇنى بۇرىن تجم قازاقستان رەسپۋبليكاسى ازاماتىن ىزدەۋ اياسىندا قۇتقارۋشىلار الماتى ماڭىنداعى تاۋلى جەردى تەكسەرۋدى جالعاستىرىپ جاتقانىن مالىمدەگەن.