الماتىنىڭ المالى اۋدانىندا قالا نىساندارىنا بوياۋمەن جازۋ جازعان ەكى ەر ادام ۇستالىپ، سوت ولاردىڭ ءارقايسىسىنا بەس تاۋلىك اكىمشىلىك قاماۋ جازاسىن تاعايىندادى، دەپ حابارلايدى infohub.kz سايتى.
NUR.KZء-تىڭ مەگاپوليس پوليسيا دەپارتامەنتىنە سىلتەمە جاساپ حابارلاۋىنشا، المالى اۋدانىندا پوليسيا قالا مۇلكىن ءبۇلدىرۋدىڭ ەكى دەرەگىن توقتاتتى. ەكى وقيعا دا ءبىر مەزگىلدە دەرلىك بولعان.
ءبىرىنشى بۇزۋشىنى ۋچاسكەلىك ينسپەكتور جىبەك جولى كوشەسىندە ۇستادى. «الماتىلىق مالسيەۆ دميتري ۆلاديميروۆيچ پاترۋلدەۋ كەزىندە دۋالعا بوياۋمەن جازۋ جازىپ جاتقان جەرىندە ۇستالدى. ءدال سول ۋاقىتتا برۋسيلوۆسكي كوشەسىندە تاعى ءبىر دەرەك تىركەلدى. 39 جاستاعى ءابدىرامانوۆ جاپپار عايبۋللاەۆيچ دۇكەن قابىرعاسىنا بوياۋمەن جازۋ جازىپ جاتقان. ونىڭ ارەكەتىن دە پوليسيا قىزمەتكەرلەرى توقتاتتى. ەكى ەر ادامعا قاتىستى قوعامدىق ورىندارداعى عيماراتتاردى، قۇرىلىستاردى جانە وزگە دە نىسانداردى لاستاۋ فاكتىسى بويىنشا اكىمشىلىك حاتتامالار تولتىرىلدى»، — دەلىنگەن حابارلامادا.
پوليسيانىڭ مالىمەتىنشە، ماتەريالدار سوتقا جىبەرىلدى. ەكى بۇزۋشى دا كىنالى دەپ تانىلدى. ءارقايسىسىنا بەس تاۋلىك اكىمشىلىك قاماۋ جازاسى تاعايىندالدى.
«پوليسيا ۆانداليزم دەرەكتەرىن انىقتاۋ جانە توقتاتۋ جۇمىسىن جالعاستىرۋدا. بوتەننىڭ مۇلكىنە جازۋ جازۋ — بەيكۇنا قىڭىرلىق ەمەس، جاۋاپكەرشىلىك كوزدەلگەن اكىمشىلىك قۇقىقبۇزۋشىلىق»، — دەپ قوستى پوليسيا دەپارتامەنتى.