الماتى مەن الماتى وبلىسىندا ەلەكتر قۋاتى ءجيى ءوشىپ تۇرعانىنا قاراماستان، تۇتىنۋشىلار ءۇشىن تاريف ءالى دە كوتەرىلەدى. بۇل نەلىكتەن بولىپ جاتقانىن «KEGOC» اق باسقارما ءتوراعاسى ءنابي ايتجانوۆ ۇكىمەتتەگى بريفينگتە ءتۇسىندىردى، دەپ حابارلايدى infohub.kz سايتى.
ايتجانوۆتىڭ ايتۋىنشا، KEGOC كومپانياسى ءۇشىن ەلەكتر ەنەرگياسى قۇنىنىڭ ءوسۋى ءالى مامىر ايىندا بولعان جانە ءبىرىڭعاي ساتىپ الۋشى باعاسىنىڭ وزگەرۋىنە بايلانىستى بولعان. «تاريفكە باستاپقىدا 13 تەڭگە سالىنعان بولاتىن، ءىس جۇزىندە ول وزگەردى، ءقازىر ءبىرىڭعاي ساتىپ الۋشىنىڭ باعاسى شامامەن 30 تەڭگەنى قۇرايدى. ول، تيىسىنشە، شىعىن قۇنىنا اسەر ەتتى»، — دەدى ول.
KEGOC باسشىسى الداعى بەسجىلدىققا جوسپارلارىمەن دە ءبولىستى: «بەسجىلدىققا ارنالعان تاريف 2026 جىلدىڭ 1 قازانىنان باستاپ جوسپارلانىپ وتىر — بەسجىلدىق باعدارلاما. ءقازىر ول تابيعي مونوپوليالاردى رەتتەۋ كوميتەتىندە قارالىپ جاتىر. الدىن الا بولجام بويىنشا، ورتاشا ءوسىم شامامەن 2 پايىزدى قۇرايدى. ال 5 جىلدىق ورتاشا تاريف 11-13 پايىزعا وسەدى. ءبىراق ناقتى ساندى ازىرگە بىلمەيمىز، ءقازىر كرەم ونى قاراستىرىپ جاتىر».
ايتجانوۆ كەلتىرىلگەن ساندار تەك KEGOC تاريفىنە قاتىستى ەكەنىن، ال تۇتىنۋشىلار ءۇشىن تۇپكىلىكتى ءتاريفتى كوميتەت بەكىتۋى ءتيىس ەكەنىن اتاپ ءوتتى.