الماتى تۇرعىنى ادال ەمەس مەردىگەردەن ءىرى سومانى سوت ارقىلى ءوندىرىپ الدى. مەردىگەر اقشانى العانىمەن، جۇمىستى اقاۋلى ورىنداپ، اياقتاماعان. ءىس جامبىل وبلىسىنىڭ مويىنقۇم اۋداندىق سوتىندا قارالدى. پاتەر يەسى جەكە كاسىپكەرگە قارسى تالاپ ارىزبەن جۇگىنگەن. ناتيجەسىندە كەلىسىمشارت بۇزىلىپ، جاۋاپكەردەن ميلليونداعان تەڭگە ءوندىرىلدى... دەپ حابارلايدى infohub.kz.
2025 جىلدىڭ قازان ايىندا تاپسىرىس بەرۋشى مەن مەردىگەر اراسىندا الماتىداعى پاتەردە جوندەۋ جۇمىستارىن جۇرگىزۋ تۋرالى كەلىسىمشارت جاسالدى. جوبانىڭ جالپى قۇنى 6،2 ميلليون تەڭگەنى قۇرادى. تاپسىرىس بەرۋشى جۇمىستىڭ العاشقى ءۇش كەزەڭى ءۇشىن مەردىگەرگە 4،7 ميلليون تەڭگە تولەدى، الايدا جوندەۋ جۇمىستارى سوزىلىپ، اياقتالماي قالدى. ورىندالعان جۇمىستار مەن پايدالانىلعان ماتەريالداردىڭ ساپاسى كەلىسىمشارت تالاپتارىنا سايكەس كەلمەدى.
جەكە كاسىپكەر اقاۋلى جۇمىستى جويۋ تۋرالى بىرنەشە رەت ايتىلعان تالاپتاردى ەلەمەدى. سوڭىندا پاتەر يەسى جوندەۋشىلەردىڭ پاتەرگە كىرۋىنە تىيىم سالىپ، كەلىسىمشارتتى بۇزۋ جانە اقشانى قايتارۋ تۋرالى تالاپپەن سوتقا جۇگىندى.
سوتتا جاۋاپكەر تالاپتى مويىنداماي، جوندەۋدىڭ ءبىر بولىگى ورىندالعانىن، ال تاپسىرىس بەرۋشىنىڭ ءۇي-جايعا كىرۋگە رۇقسات بەرمەۋىنە بايلانىستى جۇمىستى اياقتاي الماعانىن مالىمدەدى. الايدا سوت تاعايىنداعان ساراپتاما ناقتى ورىندالعان جۇمىستار مەن پايدالانىلعان ماتەريالداردىڭ قۇنى 1،4 ميلليون تەڭگەنى قۇرايتىنىن كورسەتتى. سونىمەن قاتار، ساراپشىلار پاتەردىڭ بارلىق بولمەلەرىندەگى ب ۇلىنگەن پليتكانى دەمونتاجداۋ جانە تولىق اۋىستىرۋ قۇنىن 760 مىڭ تەڭگەگە باعالادى.
سوت جەكە كاسىپكەردىڭ كەلىسىمشارت تالاپتارىن ەلەۋلى تۇردە بۇزعانىن، وسىعان بايلانىستى تاپسىرىس بەرۋشى تولەم كەزىندە كۇتكەن ناتيجەگە قول جەتكىزە الماعانىن انىقتادى. سوت شەشىمىمەن قۇرىلىس مەردىگەرلىك كەلىسىمشارتى رەسمي تۇردە بۇزىلىپ، جاۋاپكەردەن تالاپ قويۋشىنىڭ پايداسىنا 3،9 ميلليون تەڭگە نەگىزگى سوما، سونداي-اق نوتارياتتىق، وكىلدىك شىعىندار مەن ساراپتاما جۇرگىزۋگە 385 مىڭ تەڭگە ءوندىرىلدى.
قازىرگى ۋاقىتتا سوت شەشىمى زاڭدى كۇشىنە ەنبەگەن جانە وعان شاعىم جاسالۋى مۇمكىن.