زەرتتەۋشىلەر كامەرانى انتاركتيكانىڭ مۇزداي سۋىنىڭ استىنا 535 مەتر تەرەڭدىككە ءتۇسىرىپ، مۇزدى بالىقتاردىڭ الىپ كولونياسىنا كەزدەيسوق تاپ بولدى. كەمىندە 240 شارشى شاقىرىم اۋماقتا شامامەن 60 ميلليون ۇيا ورنالاسقان. بالىقتار سول ۇيالاردا ۇرپاق وسىرەدى، دەپ حابارلايدى infohub.kz سايتى.
عالىمدار ۋەددەلل تەڭىزىن نەمىس Polarstern مۇزجارعىش كەمەسىنەن زەرتتەگەن. ولار باسقا زەرتتەۋ جۇرگىزىپ، كامەرامەن تەڭىز ءتۇبىن قاراپ شىقتى. ءبىر ساتتە جازبالاردا مۇزدى بالىقتاردىڭ دوڭگەلەك ۇيالارى قايتا-قايتا كورىنە باستاعانىن بايقادى. اۋماقتى نەعۇرلىم الىس زەرتتەگەن سايىن، سونشالىقتى كوپ ۇيا تاپتى.
ءار ۇيانىڭ ديامەترى شامامەن 75 سانتيمەتر: بالىقتار تۇبىندە شاعىن شۇڭقىر قازىپ، ونى ۇساق تاستارمەن تولتىرىپ، سوندا ۋىلدىرىق سالادى. ورتا ەسەپپەن ءبىر ۇيادا 1 735 جۇمىرتقا بولادى، ال قاسىندا ادەتتە ەرەسەك بالىق «كۇزەتىپ» تۇرادى.
ءسوز Neopagetopsis ionah اتتى ەرەكشە انتاركتيكالىق مۇزدى بالىقتار تۋرالى بولىپ وتىر. ولاردىڭ قالىپتى گەموگلوبينى مەن جەتىلگەن قىزىل قان جاسۋشالارى جوق. ولار وتتەگىن تىكەلەي سۋىق سۋدان الۋعا بەيىمدەلگەن، ال ارنايى اقۋىز قوسىلىستارى ولاردىڭ دەنەسىن قاتىپ قالۋدان قورعايدى.
عالىمدار بالىقتار بۇل جەردى كەزدەيسوق تاڭداماعان دەپ ەسەپتەيدى. مۇندا تەرەڭ سۋ اعىنى وتەدى، ال تۇبىندەگى سۋ تەمپەراتۋراسى كورشىلەس اۋداندارعا قاراعاندا شامامەن 2 °C جوعارى. بۇل جاعدايلار بالىقتاردىڭ كوبەيۋىنە كومەكتەسۋى مۇمكىن. مۇنداي ميلليونداعان كولونيالار باسقا جانۋارلار ءۇشىن دە ماڭىزدى. بۇل تەرەڭدىككە ۋەددەلل يتبالىقتارى ءجيى سۇڭگيدى، سوندىقتان مۇزدى بالىقتار ولاردىڭ قورەگىنىڭ ءبىر بولىگىنە اينالۋى ىقتيمال.
بۇعان دەيىن Kursiv LifeStyle امەريكاندىق بيولوگتار الاباما شتاتىنداعى ۇڭگىردەن «شايتان بالىق» دەگەن لاقاپ اتقا يە بولعان سوقىر ۇڭگىر بالىعىنىڭ جاڭا ءتۇرىن تاپقانىن جازعان. عالىمداردىڭ ايتۋىنشا، بۇل الەمدەگى ەڭ سيرەك كەزدەسەتىن بالىقتاردىڭ ءبىرى بولۋى مۇمكىن.