جاپونيادا ءوتىپ جاتقان حح ازيادا-2026 ويىندارىندا قازاقستاندىق ترياتلونشى ارلان جاناباي قولا جۇلدەگە قول جەتكىزىپ، ۇلتتىق قۇراماعا ءتۋرنيردىڭ العاشقى مەدالىن سىيلادى، دەپ حابارلايدى infohub.kz سايتى.
ترياتلون جارىسى ءۇش كەزەڭنەن تۇردى: 750 مەتر ءجۇزۋ، 20 شاقىرىم ۆەلوجارىس جانە 5 شاقىرىم جۇگىرۋ. جاناباي بۇل قاشىقتىقتى جالپى 53 مينۋت 11 سەكۋندتا باعىندىرىپ، ءۇشىنشى ورىنعا تۇراقتادى.
جەڭىستى جاپوندىق تاكۋمي حودزو 52 مينۋت 56 سەكۋند ناتيجەسىمەن جەڭىپ الدى. كۇمىستى قىتايلىق سيجۋي چجان 53 مينۋت 5 سەكۋند ۋاقىتپەن يەلەندى. قازاقستاننىڭ تاعى ءبىر وكىلى ايان بەيسەنبايەۆ 54 مينۋت 56 سەكۋندپەن توعىزىنشى بولىپ مارەگە جەتتى.
جانابايدىڭ مەدالى ۇلتتىق قۇراما ءۇشىن ازيادا-2026-داعى تۇڭعىش جۇلدە بولدى. سپورتشىنىڭ ءوزى وسىنداي دەڭگەيدەگى جارىستا العاش رەت سىنعا ءتۇستى.
«قۋانىشىم شەكسىز. قاشىقتىقتىڭ باسىندا جوعارىراق ورىنعا تالاسۋعا جوسپارلاعان ەدىم، ءبىراق ءسال جەتپەدى. سوڭىندا كورشى وزبەكستان سپورتشىسىمەن ءۇشىنشى ورىن ءۇشىن كۇرەسۋگە تۋرا كەلدى. بار كۇشىمدى سالدىم. وتە اۋىر بولدى. مارەگە جاقىنداعاندا كوز الدىم قاراڭعىلانىپ كەتتى، ءبىراق سوڭىندا جۇلدەگەر اتاندىم. ۆەلوەتاپتان كەيىن توپتى قۋىپ جەتۋگە تۋرا كەلدى. ونى ورىنداعان سوڭ جۇلدە ءۇشىن كۇرەسە الاتىنىمدى ءتۇسىندىم. تراسسا ونشا قولايلى بولمادى. بۇرىلىستار مەن اينالمالار كوپ ەدى. ۆەلوەتاپتان كەيىن جۇگىرۋ الدىندا اياقتارىم شارشاپ قالدى. ءبىراق ءبىز جاقسى دايىندالدىق، فورما تاماشا، سوندىقتان ناتيجەگە ريزامىن. ارينە، جەڭگىم كەلدى، ءبىراق ءۇشىنشى ورىنعا دا قۋانىشتىمىن. ەڭ قيىنى جۇگىرۋ كەزەڭى، اسىرەسە سوڭعى 500 مەتر بولدى. قالعانى جاقسى ءوتتى»، — دەپ كەلتىرەدى 20 جاستاعى جانابايدىڭ ءسوزىن قازاقستان رەسپۋبليكاسىنىڭ ۇلتتىق وليمپيادالىق كوميتەتى.
جارىستىڭ العاشقى مەدال كۇنىندە قازاقستان قۇراماسى دەبيۋتتىك التىنمەن دە ەرەكشەلەندى. ازيادا-2026 چەمپيونى اتانعان ۆەلوشاباندوز ريناتا سۋلتانوۆا.