جاپونيادا ءوتىپ جاتقان ازيا ويىندارىندا العاشقى مەدالدار ساراپقا سالىندى. قازاقستان قورجىنىنا تۇڭعىش جۇلدەنى ترياتلونشى ارلان جاناباي سالدى — ول قولا مەدال جەڭىپ الدى، دەپ حابارلايدى infohub.kz سايتى.
وتانداسىمىز قاشىقتىقتى 53 مينۋت 11 سەكۋندتا باعىندىردى: 750 مەتر ءجۇزۋ، 20 شاقىرىم ۆەلوسيپەد تەبۋ جانە 5 شاقىرىم جۇگىرۋ. جاپونيالىق چەمپيون تاكۋمي حودجو 52.56 ناتيجەسىمەن مارەگە ءبىرىنشى جەتتى، جاناباي ودان نەبارى 15 سەكۋندقا قالىپ قويدى. كۇمىس جۇڭگو سپورتشىسى چجان سيۋجۇيگە بۇيىردى — ونىڭ ۋاقىتى 53.05.
جانابايدىڭ قازاقستان قۇراماسىنداعى ارىپتەسى ايان بەيسەنبايەۆ 54.56 ناتيجەسىمەن توعىزىنشى ورىندى يەلەندى. ترياتلون قاشىقتىعىنا 33 سپورتشى شىعىپ، مارەگە 29-ى جەتتى.
ازيادا تاريحىندا قازاقستان ترياتلوننان التى مەدال جەڭىپ العان. جالعىز التىندى 2006 جىلى دوحادا وتكەن ازيا ويىندارىندا دميتري گااگ يەلەنگەن. بەيسەنبايەۆ 2018 جىلى كۇمىس جۇلدەگەر اتانسا، ازيادا-2022-دە ءۇشىنشى ورىنعا تۇراقتادى.
جاپونياداعى XX جازعى ازيا ويىندارى كەشە، 19 قىركۇيەكتە، رەسمي تۇردە اشىلدى. 45 ەلدىڭ سپورتشىلارى قاتىساتىن بۇل دودادا 460 مەدال جيىنتىعى ساراپقا سالىنادى: 217ء-سى ەرلەر اراسىندا، 204ء-ى ايەلدەر اراسىندا جانە 39-ى ارالاس رازريادتاردا. جارىستار 41 سپورت ءتۇرىنىڭ 68 ديسيپليناسىندا وتەدى. ازيادا-2026-دا قازاقستان قۇراماسىنىڭ نامىسىن 559 سپورتشى قورعايدى.