ەلوردادا الدانعان ۇلەسكەرلەردىڭ كوپجىلدىق داۋى شەشىلدى: 2022 جىلى جاڭا باسپاناعا كىرۋى ءتيىس 350 وتباسى اقىرى قونى تويىن تويلادى. ولاردىڭ قۇقىقتارىن پروكۋراتۋرانىڭ ارالاسۋىنىڭ ارقاسىندا قورعاۋ مۇمكىن بولدى، دەپ حابارلايدى infohub.kz.
قاداعالاۋ ورگانىنىڭ مالىمەتىنشە، 2020 جىلى ازاماتتار تۇرعىن ءۇي كەشەنىنىڭ قۇرىلىسىنا قاراجات سالعان، الايدا قۇرىلىس سالۋشى بەس جىل بويى ءوز مىندەتتەمەلەرىن ورىنداماعان. پروكۋراتۋرا 350 ۇلەسكەردىڭ مۇددەسىنە ساي سوتقا تالاپ-ارىز بەرگەن، ناتيجەسىندە اياقتالماعان نىسان جاڭادان قۇرىلعان تۇرعىن ءۇي-قۇرىلىس كووپەراتيۆىنە بەرىلدى. وسىنىڭ ارقاسىندا قۇرىلىس اياقتالىپ، ادامدار كوپتەن كۇتكەن كىلتتەرىن الدى.
پروكۋراتۋرادا سونداي-اق اعىمداعى جىلدىڭ باسىنان بەرى سوتتار پروكۋراتۋرانىڭ 277 ۇلەسكەردى قورعاۋداعى 11 تالاپ-ارىزىن قاناعاتتاندىرىپ، جالپى سوماسى 3،9 ميلليارد تەڭگەنى قۇراعانىن اتاپ ءوتتى. ۇلەستىك قۇرىلىس سالاسىنداعى زاڭدىلىقتى قامتاماسىز ەتۋ جۇمىستارى پروكۋراتۋرا ورگاندارىنىڭ تۇراقتى باقىلاۋىندا.
ۇلەسكەرلەردى الداۋ جاعدايلارى جيىلەگەنىنە بايلانىستى ەلوردا پروكۋراتۋراسى ازاماتتاردى سالىنىپ جاتقان ۇيدەن پاتەر ساتىپ الار الدىندا ءتيىستى قۇرىلىس رۇقساتىنىڭ بار-جوعىن مىندەتتى تۇردە تەكسەرۋگە شاقىرادى.