استانا حالىقارالىق اۋەجايى 2025 جىلدى 6،9 ملرد تەڭگە شىعىنمەن اياقتادى، دەپ حابارلايدى infohub.kz سايتى.
اۋەجاي ءباسپاسوز قىزمەتىنىڭ مالىمەتىنشە، جالپى جيىنتىق كىرىس 4 ملرد تەڭگەنى قۇرادى، ال وتكەن جىلداردان جيناقتالعان جابىلماعان شىعىن 36 ملرد تەڭگەگە جەتتى. جاعدايدى تۇزەتۋ ءۇشىن اۋەجاي باسشىلىعى داعدارىسقا قارسى باعدارلامانى ىسكە قوستى.
باعدارلاما قولدانىستاعى تاريفتەردىڭ ەكونوميكالىق نەگىزدىلىگى مەن زالالسىزدىعىن ناقتى قىزمەت قۇنىن ەسكەرە وتىرىپ باعالاۋدى، وپەراسيالىق قىزمەت تيىمدىلىگىن ارتتىرۋدى جانە كاسىپورىننىڭ ىشكى رەزەرۆتەرىن پايدالانۋدى كوزدەيدى. اۆياسيالىق كەروسيندى وتكىزۋ مودەلىنىڭ وزگەرۋى جاعدايىندا نەگىزگى نازار وپەراسيالىق قىزمەت ەسەبىنەن قارجىلىق ناتيجەنى جاقسارتۋعا اۋدارىلعان.
2025 جىلدىڭ قورىتىندىسى بويىنشا شىعىنعا قاراماستان، بيىلعى جىلى اۋەجاي ءبىرقاتار نەگىزگى وندىرىستىك جانە كوممەرسيالىق كورسەتكىشتەر بويىنشا وڭ ديناميكانى كورسەتىپ وتىر. دەگەنمەن، جىلدىڭ ءبىرىنشى جارتىجىلدىعىنداعى قىزمەتكە ۇشۋ-قونۋ جولاعىن جوندەۋ جانە ونىڭ كۇندىزگى ۋاقىتتا جۇمىسىنىڭ شەكتەلۋى، اۆياسيالىق كەروسين قۇنىنىڭ ءوسۋى جانە تاياۋ شىعىستاعى جاعدايعا بايلانىستى حالىقارالىق رەيستەردىڭ ءبىر بولىگىنىڭ توقتاتىلۋى تەرىس اسەر ەتتى، سونىڭ سالدارىنان شامامەن 1،1 مىڭ رەيس بولدىرمادى.
2026 جىلدىڭ قاڭتار–شىلدە ايلارىندا اۋەجاي 5،4 ملن جولاۋشىعا قىزمەت كورسەتتى، وتكەن جىلدىڭ سايكەس كەزەڭىندە 5،3 ملن بولعان ەدى، ياعني جولاۋشىلار اعىنى 1،3%-عا ءوستى. جەتى ايداعى ىشكى رەيستەر سانى 25 مىڭنان استى (ءبىر جىل بۇرىن — 24 مىڭ)، ءوسىم شامامەن 2% قۇرادى. حالىقارالىق رەيستەر سانى 12 مىڭنان 12،4 مىڭعا دەيىن ءوستى، ياعني 3%-دان استامعا ارتتى.
داعدارىسقا قارسى شارالار اياسىندا نەگىزگى باسىمدىق قىزمەت تيىمدىلىگىن ارتتىرۋعا جانە كوممەرسيالىق باعىتتاردى دامىتۋعا بەرىلەتىن بولادى. مارشرۋتتىق جەلىنى كەڭەيتۋ ءۇشىن اۋەكومپانيالارمەن ىنتىماقتاستىقتى نىعايتۋعا ەرەكشە نازار اۋدارىلادى. مارجينالدىلىقتى ارتتىرۋ، قىزمەتتەردىڭ تابىستىلىعىن كوتەرۋ، تاريف ساياساتىن جەتىلدىرۋ جانە تەحنولوگيالاردى وڭتايلاندىرۋ مەن رەسۋرستاردى ۇتىمدى پايدالانۋ ەسەبىنەن وزىندىك قۇندى تومەندەتۋ جوسپارلانۋدا. وندىرىستىك، ەكونوميكالىق جانە باسقارۋ پروسەستەرىن وڭتايلاندىرۋ بويىنشا جۇمىس باستالدى.
باسشىلىقتىڭ باستى ماقساتى — اۋەجايدىڭ قارجى-شارۋاشىلىق قىزمەتىن زالالسىزدىق دەڭگەيىنە شىعارۋ جانە كاسىپورىننىڭ ودان ءارى دامۋى ءۇشىن تۇراقتى نەگىز قامتاماسىز ەتۋ.