استانادا قازاقستان ۇلتتىق قۇراماسى فۋتبولشىلارىنىڭ اۆتوگراف-سەسسياسى كەپتەلىسكە ۇلاستى: جانكۇيەرلەر بىلىق شىعاردى، سپورتشىلاردى قاۋىپسىزدىك ءۇشىن شارادان الىپ كەتۋگە تۋرا كەلدى، دەپ حابارلايدى infohub.kz سايتى.
Threads الەۋمەتتىك جەلىسىندەگى yerlan_absatov دەگەن پايدالانۋشىنىڭ ايتۋىنشا، وقيعا ەلورداداعى ساۋدا-ويىن-ساۋىق ورتالىقتارىنىڭ بىرىندە بولعان. ونىڭ سوزىنشە، ۇلى ءامىرلان بىرنەشە كۇن بويى سۇيىكتى ويىنشىسى تەمىرلان اناربەكوۆپەن كەزدەسۋدى كۇتكەن، الايدا شارانى ۇيىمداستىرۋ مۇلدەم ءساتسىز اياقتالعان.
«بىلىق باستالدى، تىنىس الۋ مۇمكىن بولمادى، بالالار جىلادى. سوڭىندا فۋتبولشىلاردى ەسى شىققان توپتان قورعاۋ ءۇشىن الىپ كەتتى. ءبىز بۇل شەشىمدى تولىق تۇسىنەمىز، ءبىراق ۇلىم ءقازىر قاتتى كۇيزەلىپ وتىر. ۇيىمداستىرۋشىلار بولعان جاعدايعا نازار اۋدارسا ەكەن»، — دەدى ول.
قازاقستان فۋتبول فەدەراسياسى استانادا ۇلتتىق قۇراما ويىنشىلارىمەن اۆتوگراف-سەسسيانى مەرزىمىنەن بۇرىن اياقتاۋعا تۋرا كەلگەنىن راستادى.
«وكىنىشكە قاراي، ءبارى اۆتوگراف الا المادى. بالالاردىڭ قاۋىپسىزدىگىن قامتاماسىز ەتۋ ءۇشىن شارانى ەرتەرەك اياقتاۋعا تۋرا كەلدى. ەگەر بالاڭىز اۆتوگراف الا الماسا، 19 قىركۇيەككە دەيىن ساعات 19:00-گە دەيىن marketing@kff.kz مەكەنجايىنا ءوتىنىم بەرىڭىز. بالانىڭ ءاتى-جونى مەن اتا-اناسىنىڭ بايلانىس ءنومىرىن كورسەتىڭىز. ءبىز ارنايى قول قويىلعان اشىق حات دايىندايمىز. بۇل سوڭعى كەزدەسۋ ەمەس! كەلەسى اۆتوگراف-سەسسيا وتەدى»، — دەلىنگەن فەدەراسيا حابارلاماسىندا.