استانا اكىمدىگى قوعامدىق كولىكتە ءجۇرۋ ءتاريفىن 150 تەڭگە ەتىپ بەكىتۋدى ۇسىنىپ وتىر. ونى 1 جەلتوقساننان باستاپ ەنگىزۋ جوسپارلانۋدا، دەپ حابارلايدى infohub.kz سايتى.
اكىمدىكتىڭ مالىمەتىنشە، استانادا قوعامدىق كولىكتە ءجۇرۋ ءتاريفى 90 تەڭگە بولىپ 2014 جىلى بەلگىلەنگەن. سودان بەرگى 12 جىلدا ءجۇرۋ قۇنى ءبىر-اق رەت قايتا قارالىپ، قازىرگى تاڭدا 110 تەڭگەنى قۇرايدى.
ايتا كەتۋ كەرەك، 2014 جىلدان بەرى تاسىمالداۋشىلاردىڭ نەگىزگى شىعىندارى ايتارلىقتاي وسكەن: وتىن، قوسالقى بولشەكتەر مەن جاڭا اۆتوبۋستاردىڭ قۇنى، سونداي-اق جۇرگىزۋشىلەردىڭ ەڭبەكاقىسى. ماسەلەن، 2014 جىلى ديزەل وتىنىنىڭ ءليترى شامامەن 107 تەڭگە بولسا، ءقازىر ول 329 تەڭگەگە جەتكەن. ەسەپتەۋلەرگە سايكەس، وسى كەزەڭدە ديزەل وتىنىنىڭ قۇنى 3 ەسەدەن استام وسكەن.
سونىمەن قاتار، ۆەدومستۆونىڭ اتاپ وتۋىنشە، جۇرگىزۋشىلەردىڭ ەڭبەكاقىسى دا ەداۋىر وسكەن. 2014 جىلى جۇرگىزۋشىلەردىڭ جالاقىسى ورتا ەسەپپەن 100–150 مىڭ تەڭگە شاماسىندا بولسا، ءقازىر اۆتوبۋس سىنىبى مەن جۇمىس رەجيمىنە قاراي 700 مىڭ تەڭگەدەن باستالادى.
وسى كەزەڭدە قوسالقى بولشەكتەر، اۆتوموبيل شينالارى، اككۋمۋلياتور باتارەيالارى، اۆتوبۋستارعا تەحنيكالىق قىزمەت كورسەتۋ جانە جوندەۋ، سونداي-اق جاڭا جىلجىمالى قۇرام ساتىپ الۋ قۇنى ايتارلىقتاي قىمباتتاعان.
«پايدالانۋ شىعىندارىنىڭ ايتارلىقتاي وسۋىنە قاراماستان، ەلوردادا قوعامدىق كولىكتى جۇيەلى جاڭارتۋ جانە دامىتۋ جالعاسۋدا. سوڭعى ءۇش جىلدا تاسىمالداۋشىلار قاۋىپسىزدىك، جايلىلىق جانە ەكولوگيالىق ستاندارتتارعا ساي كەلەتىن 1127 بىرلىك جاڭا جىلجىمالى قۇرام ساتىپ الدى. بۇعان قوسا، استانادا حالىقتى الەۋمەتتىك قولداۋدىڭ قولدانىستاعى شارالارى ساقتالۋدا. استانا قالاسى ءماسليحاتىنىڭ 2018 جىلعى 29 ناۋرىزداعى № 244/30-VI شەشىمىنە سايكەس، جەكەلەگەن ساناتتاعى ازاماتتارعا قالالىق جولاۋشىلار كولىگىندە ءجۇرۋ اقىسىنان بوساتۋ تۇرىندەگى الەۋمەتتىك كومەك كورسەتىلەدى»، — دەلىنگەن حابارلامادا.
تەگىن ءجۇرۋ قۇقىعى مىنا ساناتتاعى ازاماتتارعا بەرىلەدى: ۇلى وتان سوعىسىنىڭ قاتىسۋشىلارى مەن مۇگەدەكتەرى جانە ولارعا تەڭەستىرىلگەن ادامدار؛ جاسى جانە ەڭبەك ءوتىلى بويىنشا زەينەتكەرلەر، سونداي-اق زەينەتكەرلىك جاسقا تولعان جاسى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى الۋشىلار؛ كوپبالالى انالار؛ كوپبالالى وتباسىلار؛ مۇگەدەكتەر؛ ون سەگىز جاسقا دەيىنگى مۇگەدەك بالالار، ونىڭ ىشىندە اتا-انالارىنىڭ ءبىرى (زاڭدى وكىلدەرى)؛ قازاقستانداعى 1986 جىلعى 17–18 جەلتوقسان وقيعالارىنا قاتىسۋشىلار قاتارىنان ساياسي قۋعىن-سۇرگىن قۇرباندارى، «جاپپاي ساياسي قۋعىن-سۇرگىن قۇرباندارىن اقتاۋ تۋرالى» قازاقستان رەسپۋبليكاسىنىڭ زاڭىندا بەلگىلەنگەن تارتىپپەن اقتالعاندار.
بۇدان بولەك، 2020 جىلدىڭ ناۋرىزىنان باستاپ استانادا وقيتىن 18 جاسقا دەيىنگى بالالارعا تەگىن ءجۇرۋ قولدانىلادى.
«سونىمەن قاتار، اۆتوموبيل كولىگىمەن جولاۋشىلار مەن باگاجدى تاسىمالداۋ تاريفتەرىن ەسەپتەۋ ادىستەمەسىنە سايكەس جۇرگىزىلگەن ەسەپتەۋلەر بويىنشا، 2026 جىلى ءبىر ءجۇرىستىڭ ورتاشا ەسەپتىك قۇنى قولدانىستاعى ءجۇرۋ قۇنىنان ايتارلىقتاي اسىپ تۇسەدى. پايدالانۋ شىعىندارىنىڭ وسۋىنە، قوعامدىق كولىكتىڭ تۇراقتى جۇمىسىن قامتاماسىز ەتۋ، اۆتوبۋس پاركىن ودان ءارى جاڭارتۋ جانە باعىتتار جەلىسىن دامىتۋ قاجەتتىلىگىنە بايلانىستى 1 جەلتوقساننان باستاپ قولما-قول ەمەس تولەم كەزىندە ءجۇرۋ قۇنىن 150 تەڭگە مولشەرىندە بەلگىلەۋ ۇسىنىلادى»، — دەدى اكىمدىكتە.