قازاقستان پرەمەر-ليگاسىنىڭ 2026 جىلعى ماۋسىمىنداعى 26-تۋرىنىڭ ورتالىق ويىنىندا «استانا» شىمكەنتتە «ورداباسىعا» 0:1 ەسەبىمەن ۇتىلدى. ويىنعا بىرنەشە كۇن قالعاندا ەلوردالىق كلۋبتىڭ بولاشاق دەمەۋشىسى فۋتبولشىلار الدىنداعى قارىزىن جاپتى، دەپ حابارلايدى infohub.kz سايتى.
«استانانىڭ» نەگىزگى قۇرامىنداعى ويىنشىلاردىڭ قارىز تولىق وتەلمەيىنشە چەمپيوناتتا وينامايتىنىن مالىمدەپ، ۇجىمدىق ءوتىنىش جاساۋى اسەر ەتتى. جالاقى قارىزى وتەلدى دە، كوماندا شىمكەنتكە كوڭىل-كۇيى جاقسى بارىپ قايتتى.
25-تۋردا «وقجەتپەسكە» ويدا جوقتا ۇتىلعان «ورداباسى» التىن دوداسىنداعى كوشباسشىلىقتان ايىرىلدى. ەندى شىمكەنتتىكتەر ءوز ناتيجەلەرىمەن قاتار «قايراتتىڭ» ويىندارىنا دا تاۋەلدى بولىپ وتىر.
كۇنتىزبە ەركىمەن «استانا» چەمپيوندىققا ۇمىتكەرلەردى كەزەك-كەزەك سىناپ جاتىر. شىمكەنتتە الاڭ يەلەرى اعىمداعى ۆيسە-چەمپيونعا سىناقتان ءساتتى ءوتتى. اندرەي ءمارتيننىڭ جىگىتتەرىنىڭ گول سوعۋ مۇمكىندىكتەرى از بولمادى. ەكىنشى تايمدا لەو ناتەلدىڭ دوپتى قاقپانىڭ كولدەنەڭىنەن قاتتى كەرۋىنىڭ ءوزى ءبىر باسى. بۇل ەپيزودتا برازيليالىققا بوتەن ايىپ الاڭىندا ەشكىم كەدەرگى جاسامادى، ءبىراق ونىڭ كوزدەۋى ءسال قيسايىپ كەتتى.
گريگوري باباياننىڭ جىگىتتەرى شابۋىلعا شابۋىلمەن جاۋاپ بەرۋگە تىرىستى. ولار دا ايتارلىقتاي ءقاۋىپتى ساتتەر جاسادى. ال تەڭ ويىننىڭ ەلەسى كورىنگەندە، جاسۋلان امير ايىپ الاڭىنىڭ سىرتىنان بۇرىشقا ءدال سوعىپ، «ورداباسىعا» جەڭىس اپەردى – 1:0.
شىمكەنتتىكتەر التىن دوداسىندا «قايراتتى» قايتا باسىپ وزدى، ءبىراق توبەدەگى ورىن اۋىستىرۋ ەرتەڭ دە جالعاسۋى مۇمكىن. جەكسەنبىدە چەمپيوندار «توبىلدى» قابىلدايدى.
قازاقستان پرەمەر-ليگاسى-2026. 26-تۋر ويىندارى. 12 قىركۇيەك.
«ورداباسى» (شىمكەنت) – «استانا» 1:0 (0:0). گول: امير 78.
«كاسپي» (اقتاۋ) – «اقتوبە» 1:2 (0:1). گولدار: سوسا 39 (0:1)، ودجو 72 (0:2)، مورگادۋ 87 (1:2). پەنالتيدەن سوعىلماعان دوپ: شۋشەناچيەۆ (ا، 39) قاقپاشى.
«ەلىماي» (سەمەي) – «جەتىسۋ» (تالدىقورعان) 2:1 (2:1). گولدار: زيۆانوۆيچ 7 (0:1)، پلاككا 17 (1:1)، مۇرتازايەۆ 21 (2:1).
«جەڭىس» (استانا) – « قىزىلجار» (پەتروپاۆل) 3:1 (1:1). گولدار: يمنادزە 31 (1:0)، ۋروشەۆيچ 35 (1:1)، يمنادزە 74 (2:1)، ەلدەر سانتانا 90+3 (3:1).
«قايسار» ( قىزىلوردا) – «اتىراۋ» 1:0 (0:0). گول: سۋسكيچ 83. الاڭنان قۋىلدى: مۋحامەد (ق، 90+2).
مەدال ءۇمىتىن جوعالتپاعان «اقتوبە» اقتاۋدا جەڭىسكە جەتتى. 39-مينۋتتا كاسپيلىكتەردىڭ قاقپاشىسى دىنمۇحاممەد جومارت ارتۋر شۋشەناچەۆتىڭ نۇكتەدەن سوققان دوبىن قايتاردى. الايدا بىرنەشە رەت قايتارىلعان دوپتان كەيىن نيگەرلىك شابۋىلشى دانيەل سوسا ەسەپ اشتى. اقتوبەلىكتەردىڭ اعىلشىن جارتىلاي قورعاۋشىسى شەيي ودجو ەكىنشى تايمدا ەسەپتى ەسەلەدى. پورتۋگاليالىق بەرناردۋ مورگادۋدىڭ گولى «كاسپيگە» جەڭىلىستىڭ اششى ءدامىن ءسال تاتتىلەندىردى.
ءدال وسىنداي 2:1 ەسەبىمەن «ەلىماي» سەمەيدە «جەتىسۋدى» ۇتتى. اندرەي كارپوۆيچتىڭ كومانداسى ۇيدەگى ويىننىڭ 7-مينۋتىندا-اق 0:1 ەسەبىمەن ۇتىلىپ قالدى. سەرب ماركو جيۆانوۆيچ كوزگە ءتۇستى. ءبىراق ۇزىلىسكە دەيىن توگولىق ەلوش پلاككا مەن رومان مۇرتازايەۆ ءبىر-بىر گول سوعىپ، ويىن بارىسىن وزگەرتتى. ۇتىلعان سوڭ تالدىقورعاندىقتار ءتۇسىپ قالۋ ايماعىنا تومەندەدى.
ۇيدەگى ويىننىڭ سوڭىندا «اتىراۋدى» قىسپاققا العان «قايسار» سوڭعى ورىننان كوتەرىلدى. ءارى اتالعان «اتىراۋمەن» ۇپاي سانىن تەڭەستىردى. كپل-داعى ءومىر ءۇشىن كۇرەس قىزعىلىقتى بولاتىنى ءسوزسىز.
كپل-2026-نىڭ 26-تۋرى ەرتەڭ «قايرات» – «توبىل»، «ەرتىس» – «وقجەتپەس» جانە « ۇلىتاۋ» – «التاي» ويىندارىمەن اياقتالادى.