ەلوردالىق «استانا» فۋتبول كلۋبى ويىنشىلار الدىنداعى قارىزىنىڭ بارىن رەسمي راستاپ، كوماندا ماۋسىمدى سوڭىنا دەيىن جەتكىزەتىنىن مالىمدەدى، دەپ حابارلايدى infohub.kz سايتى.
كلۋب قوعامدا تاراعان قارجىلىق پروبلەمالار تۋرالى اقپاراتقا جاۋاپ بەردى. بۇعان دەيىن ينسايدەر ەلدار امانبايەۆ كەيبىر فۋتبولشىلار ءۇش ايلىق جالاقى قارىزى وتەلمەيىنشە الاڭعا شىعۋدان باس تارتىپ جاتقانىن، جالپى سوماسى 700 ميلليون تەڭگەنى قۇرايتىنىن حابارلاعان ەدى.
كلۋبتىڭ Instagram-پاراقشاسىندا جاريالانعان رەسمي مالىمدەمەدە: «"استانا" فك نەگىزگى قۇرامداعى ءبىرقاتار فۋتبولشىلار الدىنداعى جەكەلەگەن كەلىسىمشارتتىق مىندەتتەمەلەر بويىنشا بەرەشەگىنىڭ بارىن راستايدى، وسىعان بايلانىستى ۇجىمدىق ءوتىنىش ءتۇستى. كلۋب باسشىلىعى فۋتبولشىلاردىڭ ۇستانىمىن تۇسىنىستىكپەن قابىلدايدى. قالىپتاسقان قارجىلىق قيىندىقتارعا قاراماستان، فۋتبولشىلار مەن باپكەرلىك شتاب ۇزاق ۋاقىت بويى كاسىبي مىندەتتەرىن تولىق كولەمدە ورىنداپ، جاتتىعۋ پروسەسىنە جانە رەسمي ماچتارعا قاتىسىپ، الاڭدا "استانا" فك مەن قازاقستان استاناسىنىڭ ابىرويىن لايىقتى قورعادى»، — دەلىنگەن.
كلۋب ويىنشىلاردىڭ جانكۇيەرلەرگە، كلۋبقا جانە ونىڭ سپورتتىق ماقساتتارىنا ادالدىعىنا كۇماندانبايتىنىن اتاپ ءوتىپ، الىپ-قاشپا اڭگىمەلەر مەن اسىعىس قورىتىندىلاردان اۋلاق بولۋعا شاقىردى. «كلۋب كوماندا الدىنداعى كەلىسىمشارتتىق مىندەتتەمەلەرىن ورىنداۋ ءۇشىن قاجەتتى شارالاردى قابىلداۋدا. جاعداي قالاي دامىعانىنا قاراماستان، "استانا" فك ەل چەمپيوناتىندا ونەر كورسەتۋدى جالعاستىرىپ، ماۋسىمدى سوڭىنا دەيىن جەتكىزەدى. كلۋب ءوز جۇمىسىن ادەتتەگى رەجيمدە جالعاستىرادى»، — دەپ اتاپ وتىلگەن حابارلامادا.
«استانادا» سونداي-اق ءاربىر فۋتبولشى مەن قىزمەتكەردىڭ، ونىڭ ىشىندە وتباسى الدىنداعى مىندەتتەمەلەرىن تۇسىنەتىندەرىن جانە قارىز ماسەلەسىن شەشۋدى كلۋب قۇرىلتايشىسىمەن بىرگە باسىم مىندەتتەردىڭ ءبىرى دەپ سانايتىندارىن جەتكىزدى. كوماندانىڭ قازاقستان پرەمەر-ليگاسىندا ونەر كورسەتۋىن توقتاتۋ ماسەلەسى قاراستىرىلعان جوق. «قاجەت بولعان جاعدايدا نەگىزگى قۇرامعا رەزەرۆتەگى ويىنشىلاردى، جاستار كومانداسىنىڭ مۇشەلەرىن نەمەسە ونەر كورسەتۋگە قۇقىعى بار باسقا دا فۋتبولشىلاردى تارتۋ مۇمكىندىگى قاراستىرىلعان. كلۋب كۇنتىزبەگە سايكەس بارلىق ماچتارعا قاتىسۋدى قامتاماسىز ەتەدى»، — دەپ تۇيىندەدى كلۋب وكىلدەرى.
ءقپل-دىڭ اعىمداعى ماۋسىمىندا قازاقستاننىڭ جەتى دۇركىن چەمپيونى 23 ماچتان كەيىن 45 ۇپاي جيناپ، ءۇشىنشى ورىندا تۇر. جوعارىدا شىمكەنتتىك «ورداباسى» (55 ۇپاي) جانە الماتىلىق «قايرات» (54 ۇپاي) ورنالاسقان.