استاناداعى ءبىر جوعارى وقۋ ورنىنىڭ جاتاقحانا كومەندانتى بەس جىل بويى ستۋدەنتتەر مەن قىزمەتكەرلەردەن اي سايىن 14 300 تەڭگەدەن جيناپ، مۇنى باسشىلىقتىڭ تاپسىرماسى دەپ سەندىرىپ كەلگەن. سوت ونىڭ جالعان قۇجاتتار ارقىلى شەتەلدىكتەرگە تىركەۋ ءراسىمىن اقىعا جاساعانىن دا انىقتادى، دەپ حابارلايدى infohub.kz سايتى.
ءىستى استانا قالاسىنىڭ اۋدانارالىق قىلمىستىق ىستەر جونىندەگى سوتى قارادى. ايەلگە قازاقستان رەسپۋبليكاسى قىلمىستىق كودەكسىنىڭ بىردەن ءۇش بابى بويىنشا ايىپ تاعىلدى: «الداۋ جولىمەن م ۇلىكتىك زالال كەلتىرۋ»، «رەسمي قۇجاتتى قولدان جاساۋ» جانە «زاڭسىز كوشى-قوندى ۇيىمداستىرۋ».
سوتتا ۋنيۆەرسيتەت باسشىلىعىنىڭ كومەندانتقا اقشا جيناۋدى تاپسىرماعانى دالەلدەندى. ونىڭ ارەكەتىنەن كەلتىرىلگەن زالال 3 ملن تەڭگەدەن استى.
«كەلتىرىلگەن ماتەريالدىق زالال وتەلمەگەن»، — دەپ مالىمدەدى سوتتا.
سونىمەن قاتار ءىس ماتەريالدارىنا سايكەس، ايەل وقۋ ورنىنىڭ قۇجاتتارىن قولدان جاساپ، ءوزىنىڭ جۇمىس كومپيۋتەرىنەن «ازاماتتارعا ارنالعان كورپوراسياعا» وتىنىشتەر جىبەرىپ، شەتەلدىكتەرگە ءبىر جىلعا تىركەۋ ءراسىمىن جاساپ بەرگەن.
2024 جىلعى 16 قىركۇيەكتەن 2025 جىلعى 13 اقپانعا دەيىن وسىلايشا جاتاقحانادا 57 ادام تىركەلگەن. ءارقايسىسى ءۇشىن كومەندانت 40 مىڭ تەڭگەدەن العان.
سوتتالۋشى كىناسىن مويىنداماي، اقتاۋدى سۇرادى. پروكۋرور ءتورت جىل باس بوستاندىعىنان ايىرۋدى تالاپ ەتتى.
تۇبىندە سوت ايەلدى ەكى جىلعا باس بوستاندىعىنان ايىرىپ، ءۇش جىل بويى ۇيىمداستىرۋشىلىق-شارۋاشىلىق فۋنكسيالارعا بايلانىستى لاۋازىمداردى اتقارۋعا تىيىم سالدى.
«ۇكىم شىعارۋ بارىسىندا سوت ايەلدىڭ كامەلەتكە تولماعان بالاسى بارىن جانە بۇرىن سوتتى بولماعانىن ەسكەردى. جابىرلەنۋشى تاراپتىڭ ازاماتتىق تالابى قاناعاتتاندىرىلدى»، — دەپ ناقتىلادى سوتتىڭ ءباسپاسوز قىزمەتى.
ۇكىم ازىرگە زاڭدى كۇشىنە ەنگەن جوق.
بۇعان دەيىن «كۋرسيۆ» شىمكەنتتە جوعارى وقۋ ورنىنداعى جىمقىرۋ ءىسى بويىنشا بۇرىنعى پرورەكتوردىڭ سوتتالعانىن جازعان بولاتىن.