InfoHub Logo

استاناداعى جەڭىل رەلستى كولىك (LRT) جولاۋشىلارىنىڭ پىكىرىن ءبىلۋ ءۇشىن ءتىلشىمىز "تەاتر" ستانسياسىنان "استانا ارەنا" ستانسياسىنا دەيىنگى باعىتتى ءجۇرىپ ءوتتى. ساپار بارىسىندا 20-دان استام جولاۋشىمەن سۇحباتتاسۋ مۇمكىندىگى بولدى. ولاردىڭ كەيبىرى باعانىڭ 500 تەڭگەگە كوتەرىلۋىنە قارسى بولسا، ەندى ءبىرى بۇل باعانى قولايلى دەپ سانايدى.

بۇل تۋرالى Infohub.kz اقپارات اگەنتتىگى حابارلايدى.

قازىرگى تاڭدا LRT-عا بيلەت قۇنى 200 تەڭگە. الايدا، ماماندار دۋباي مەن ىستامبۇل تاجىريبەسىن العا تارتىپ، باعانى كوتەرۋدى ۇسىنىپ وتىر. وسىعان بايلانىستى، ءبىز جولاۋشىلاردىڭ ويىن انىقتاۋعا تىرىستىق.

جولاۋشىلاردىڭ پىكىرى

باعانىڭ كوتەرىلۋىنە قارسى شىققانداردىڭ ءبىرى: "500 تەڭگە تىم قىمبات بولادى. جاقىندا عانا اشىلدى، ءالى باعاسىن ورنىقتىرا قويماعان، ال ءقازىر كوتەرمەكشى"، - دەدى.

ستۋدەنتتەر ءۇشىن 500 تەڭگە قىمبات ەكەنىن ايتقان جولاۋشىلار دا بولدى. "ستۋدەنتتەر ءۇشىن 500 تەڭگە قىمبات. وندايدا تاكسيمەن ءجۇرۋ الدەقايدا ءتيىمدى بولار ەدى"، - دەدى ولار.

زەينەتكەرلەر دە باعانىڭ وسۋىنە الاڭداۋلى. "زەينەتاقى الاتىن ادامعا 500 تەڭگە كوپ سياقتى. بۇل بيۋدجەتكە اۋىر تيەدى"، - دەپ پىكىر ءبىلدىردى.

الايدا، كەيبىر جولاۋشىلار 500 تەڭگەلىك باعانى قالىپتى دەپ سانايدى. "بۇل باعا ماعان قولايلى سياقتى. كەپتەلىس جوق، تەز ءارى ىڭعايلى جەتۋگە بولادى"، - دەدى ءبىر سۇحباتتاسۋشى.

باعانى كوتەرۋ سەبەبى

تاريفتەردى تالقىلاۋعا ەكونوميكالىق شولۋشى ولجاس ءبايدىلدينوۆتىڭ LRT-عا ءبىرىڭعاي تاريف جۇيەسىن سىناعان مالىمدەمەسى سەبەپ بولدى. ونىڭ ايتۋىنشا، بۇكىل مارشرۋت ءۇشىن 200 تەڭگەلىك بەكىتىلگەن باعا ەكونوميكالىق تۇرعىدان نەگىزسىز جانە ادىلەتسىز، سەبەبى جوبانىڭ وپەراسيالىق شىعىندارىن دا جاپپايدى.

ءوز كەزەگىندە، LRT جۇيەسىن باسقاراتىن "CTS" كولىك كومپانياسى دا 200 تەڭگەلىك ءتاريفتىڭ شىعىنداردى تولىق جاپپايتىنىن مويىندادى.