اتىراۋدا ALTYN ORDA حالىقارالىق ساداق اتۋ ءتۋرنيرى اشىلدى. وعان قازاقستان مەن الەمنىڭ 18 ەلىنەن 200-دەن استام ساداقشى قاتىسۋدا. قاتارلارىندا ۆەنگريا، وزبەكستان، يران، ءۇندىستان، كورەيا رەسپۋبليكاسى، ۇلىبريتانيا، فرانسيا، ماروككو جانە باسقا دا مەملەكەتتەر بار. بۇل تۋرالى infohub.kz سايتى حابارلايدى.
ءداستۇرلى ساداق اتۋدى ناسيحاتتاۋ، ۇلتتىق سپورت ءتۇرىن دامىتۋ، شەبەرلىكتى شىڭداۋ جانە حالىقارالىق دەڭگەيدە تاجىريبە الماسۋ ماقساتىندا ءوتىپ جاتقان بۇل جارىس داستۇرگە اينالعان.
ءتۋرنيردىڭ رەسمي اشىلۋىندا اتىراۋ وبلىسىنىڭ اكىمى بولات اقشولاقوۆ قاتىسۋشىلاردى قۇتتىقتاپ، اتىراۋدا وتەتىن جارىستىڭ ەرەكشە سيمۆولدىق ءمانىن اتاپ ءوتتى. «اتىراۋ — التىن وردا داۋىرىمەن تىكەلەي بايلانىستى، تاريحى تەرەڭ قاسيەتتى ولكە. وڭىردە ورنالاسقان ەجەلگى سارايشىق قالاسى ۇلتتىق تاريحتا الار ورنى ەرەكشە. سوندىقتان اتىراۋدا ALTYN ORDA حالىقارالىق ساداق اتۋ ءتۋرنيرىنىڭ ءوتۋى ۇلى وتكەنىمىز بەن بۇگىنىمىزدى جالعاستىراتىن تەرەڭ سيمۆولدىق ماعىناعا يە. بۇل — جاي عانا سپورتتىق جارىس ەمەس، تاريحىمىزعا دەگەن قۇرمەت پەن ۇلتتىق ونەردىڭ جاڭعىرۋىنىڭ تەرەڭ بەلگىسى. بۇل — ۇلى دالانىڭ ءتىرى مۇراسى رەتىندە ساداق اتۋدى بۇكىل الەمگە تانىتۋ جولىنداعى قادامىمىز. بۇگىن وڭىردە ءداستۇرلى ساداق اتۋدىڭ ماتەريالدىق-تەحنيكالىق بازاسىن نىعايتۋ جانە سپورتشىلاردى دايارلاۋعا جاعداي جاساۋ بويىنشا اۋقىمدى جۇمىستار جۇرگىزىلۋدە. باستى ماقساتىمىز — ۇلتتىق سپورتتى دامىتۋعا قولايلى جاعداي جاساۋ عانا ەمەس، سونىمەن قاتار اتىراۋدا الەمدىك دەڭگەيدەگى جاڭا چەمپيونداردى تاربيەلەۋ. ساداقشىلارىمىزعا ساتتىلىك، ءدال تيگىزىپ، جەڭىسكە جەتۋلەرىن تىلەيمىن! بارشاڭىزعا زور دەنساۋلىق پەن تابىس تىلەيمىن»، — دەدى بولات اقشولاقوۆ.
وڭىردە ءداستۇرلى ساداق اتۋدى دامىتۋعا ەرەكشە كوڭىل بولىنۋدە. بۇگىندە وبلىستا بۇل سپورت تۇرىمەن 100-دەن استام ادام تۇراقتى تۇردە اينالىسادى. ولاردىڭ قاتارىندا 2 حالىقارالىق دارەجەدەگى سپورت شەبەرى، 8 قازاقستان رەسپۋبليكاسىنىڭ سپورت شەبەرى جانە 25 سپورت شەبەرلىگىنە كانديدات بار.
ءىس-شارا اياسىندا ءوڭىر باسشىسى VI دۇنيەجۇزىلىك كوشپەندىلەر ويىندارىندا جوعارى ناتيجە كورسەتكەن اتىراۋ وبلىسىنىڭ سپورتشىلارىنا العىس حاتتار تابىس ەتتى. ولاردىڭ قاتارىندا كوكپاردان كۇمىس جۇلدەگەر ابىلاي ۇلىقپانوۆ جانە ءداستۇرلى ساداق اتۋدان قولا جۇلدەگەر ءالي سەسيگيۋزەل بار.
جارىستىڭ ءبىرىنشى كۇنىنىڭ قورىتىندىسى بويىنشا «پۋتا» ديسيپليناسىندا ەرلەر مەن ايەلدەر اراسىندا ىرىكتەۋ كەزەڭدەرى ءوتتى. ەرلەر اراسىندا ءۇشىنشى ورىندى زابيت ساتويەۆ يەلەنسە، ايەلدەر اراسىندا قولا جۇلدەنى رەسەيدەن كەلگەن ميلياۋشا حاليلوۆا جەڭىپ الدى. ەرتەڭ سپورتشىلار «قالقان» ديسيپليناسىندا جۇلدەلەر ءۇشىن كۇرەستى جالعاستىرادى.
جارىس 15 قىركۇيەككە دەيىن جالعاسادى. بىرنەشە كۇن بويى ساداقشىلار ءداستۇرلى ساداق اتۋدىڭ ءتۇرلى ديسيپلينالارىندا جۇلدەلەردى ساراپقا سالادى. سپورتشىلاردىڭ ونەرىن حالىقارالىق تورەشىلەر باعالايدى.