اتىراۋداعى مەكتەپتەردىڭ ءبىرىنىڭ ءمۇعالىمى دەمالىس كەزىندە كابينەتتى جوندەۋگە جانە تازالىق جۇمىستارىنا ماجبۇرلەگەنىن ايتىپ، شاعىمداندى. ءبىلىم باسقارماسى بۇل فاكتى بويىنشا تەكسەرۋ باستادى، دەپ حابارلايدى infohub.kz سايتى.
ءمۇعالىم الەۋمەتتىك جەلىدە كابينەتتى جوندەۋگە تارتىلعانىن، جۇمىس اياقتالعان سوڭ قوسىمشا تاپسىرمالار بەرىلە بەرگەنىن جازدى. «ءبىزدى كابينەت جوندەۋگە ماجبۇرلەدى. مەن جانجال شىعارعىم كەلمەدى، ءسويتىپ ءبارىن ىستەدىم»، — دەپ جازدى ول.
ونىڭ ايتۋىنشا، ول ەدەندى ءوزى جۋىپ، شاڭ ءسۇرتىپ، قابىرعالاردى اكتەگەن. جۇمىس شامامەن ءبىر اپتاعا سوزىلعان جانە ونى فيزيكالىق تۇرعىدان شارشاتقان. الايدا ودان كەيىن دە تاپسىرمالار بەرىلە بەرگەن، سونىڭ ءبىرى — دەمالىس كەزىندە پلافونداردى تازالاۋ.
«ول ءۇشىن باسپالداققا شىعىپ، ەلەكتر قۇرىلعىلارىمەن جۇمىس ىستەۋ كەرەك. مەن سىپايى تۇردە باس تارتتىم»، — دەدى ول. ءمۇعالىمنىڭ ايتۋىنشا، باس تارتقان سوڭ وقۋ ءىسىنىڭ مەڭگەرۋشىسى: «ۇيدەگى ليۋسترالاردى ءوزىڭىز جۋاسىز با؟» دەپ سۇراعان. پەداگوگ مۇنداي تاپسىرمالاردى ءوزىنىڭ ەڭبەك مىندەتتەرىنىڭ بولىگى دەپ سانامايتىنىن ايتتى.
«مەن ءمۇعالىم بولىپ جۇمىس ىستەگىم كەلەدى»، — دەپ اتاپ ءوتتى ول. پەداگوگ سونىمەن قاتار ءوزىنىڭ كاسىبي قىزمەتى مەن وقۋشىلارىنىڭ جەتىستىكتەرى تۋرالى ايتىپ، بالالاردى كونكۋرستار مەن كورمەلەرگە دايىندايتىنىن اتاپ ءوتتى. «مەن ولاردىڭ ءارقايسىسىنا شىنىمەن جان سالامىن»، — دەپ جازدى ءمۇعالىم.
اتىراۋ وبلىسىنىڭ ءبىلىم باسقارماسى جاريالانىمعا جاۋاپ بەرىپ، تەكسەرۋ باستالعانىن حابارلادى. «الەۋمەتتىك جەلىلەردە پەداگوگتاردىڭ ءبىلىم بەرۋ ۇيىمدارىن جاڭا وقۋ جىلىنا دايىنداۋ جۇمىستارىنا تارتىلۋى تۋرالى اقپارات تارالۋدا. وسىعان بايلانىستى اتىراۋ وبلىسىنىڭ ءبىلىم باسقارماسى اتالعان فاكتىلەر بويىنشا قىزمەتتىك تەرگەۋ جۇرگىزىلىپ جاتقانىن حابارلايدى»، — دەلىنگەن ۆەدومستۆو حابارلاماسىندا.
باسقارمادا پەداگوگتاردىڭ ەڭبەك قۇقىقتارىنىڭ ساقتالۋى قازاقستان رەسپۋبليكاسىنىڭ ەڭبەك زاڭناماسى جانە «پەداگوگ مارتەبەسى تۋرالى» قازاقستان رەسپۋبليكاسى زاڭىنىڭ تالاپتارىنا سايكەس قامتاماسىز ەتىلەتىنىن اتاپ ءوتتى. «ەگەر تەكسەرۋ بارىسىندا مۇعالىمدەردىڭ كاسىبي مىندەتتەرىنە جاتپايتىن جۇمىستارعا زاڭسىز تارتىلعانى انىقتالسا، جاۋاپتى تۇلعالارعا قولدانىستاعى زاڭناماعا سايكەس ءتيىستى شارالار قابىلدانادى»، — دەپ مالىمدەدى ۆەدومستۆودا.