- سايىنوۆانىڭ شاكىرتى نە بولدى؟

ديرەكتوردىڭ بولمەسىندە وتىرعان بايانباەۆانىڭ وسىندا كىرگەندەگى كوڭىلى ءپاس تارتتى. الگىندە عانا قالالىق جارىستان وزىپ شىققان شاكىرتى ايانانىڭ تابىسى ديرەكتور حانىمدى اسا قۋانتا قويعان جوق. بايانباەۆانىڭ الابۇرتقان كوڭىلى وسىعان ساپ باسىلدى.

ديرەكتور سۇراعىن تاعى دا قايتالادى:

- سايىنوۆانىڭ شاكىرتى نە بولدى؟

- سايىنوۆا... - بايانباەۆا ديرەكتور حانىمنىڭ كوڭىلىنە قاراپ كىبىرتىكتەپ قالدى. - سايىنوۆانىڭ شاكىرتى قالالىق جارىستان وتە المادى.

سول-اق ەكەن، ديرەكتوردىڭ قاباعى قارس ءتۇيىلىپ كەتتى.

- وتە الماعان ەكەن عوي!.. - بايانباەۆا ديرەكتوردىڭ داۋسىنان الدەبىر كۇيىنىشتى لەپتى سەزدى.

"ادامدى نەگە الالايدى؟ - دەپ ويلادى بايانباەۆا. - مەن دە وسى مەكتەپتىڭ مۇعاليماسى ەمەسپىن بە؟ مەنىڭ شاكىرتىم ايانا دا وسى مەكتەپتىڭ وقۋشىسى عوي".

راس، سايىنوۆانىڭ كورسەتكەن كورسەتكىشتەرى جوعارى ەدى. سايىنوۆا دەڭگەيى جوعارى پەداگوگ بولىپ ەسەپتەلەتىن. ءبىراق سايىنوۆانىڭ قالالىق جارىستان شاكىرتىن قۇلاتىپ العاندىعىنا بايانباەۆا كىنالى ەمەس قوي.

بايانباەۆانىڭ ەكى شەكەسى سولقىلدادى. دەنەسى قىزىنىپ، بۋسانىپ كەتكەندەي بولدى.

- سايىنوۆانىڭ شاكىرتى قۇلاعان ەكەن عوي...

بايانباەۆانىڭ قۇلاعىنا ديرەكتوردىڭ داۋسى قاڭعىر-كۇڭگىر ەتىپ ەستىلدى. ديرەكتوردىڭ نە ايتىپ وتىرعاندىعىن بايانباەۆا سوسىن عانا بارىپ ءتۇسىندى. ءبىراق ديرەكتور بۇل كەزدە بايانباەۆاعا قاراپ سويلەپ وتىرعان جوق ەدى.

بايانباەۆا ديرەكتوردىڭ بولمەسىنەن كوڭىلسىز شىقتى. الگىندە عانا شاكىرتى ايانا ەكەۋىنىڭ قالالىق جارىستان شىققاننان كەيىن ماز-مەيرام بولىپ كەلە جاتقانداعى ساتتەرىن الدەنە كومەسكىلەندىرىپ تاستاعانداي بولدى. سوندا بايانباەۆا شاكىرتى ايانانى باۋىرىنا قىسىپ تۇرىپ: "اينالايىن-اي!" دەگەن ەدى جاقسى كورىپ.

بايانباەۆانىڭ قۇلاعىنا كەنەت "اپاي!" دەگەن نازىك داۋىس ەستىلگەندە، ءوزىن توسىپ تۇرعان شاكىرتى ايانانى كوردى. ايانا ۇستازىنىڭ جانىنا جۇگىرىپ كەلدى.

- اپاي! تاپسىرمالارعا دايىندالا بەرەيىن بە؟!

بايانباەۆا كەنەت سەرپىلىپ كەتتى:

- دايىندال! ءالى وبلىستىق كەزەڭنەن دە توپ جاراتىن بولامىز!

بايانباەۆانىڭ اۋزىنا سول جولى قۇداي سالدى ما ەكەن، بۇگىن شاكىرت پەن ۇستاز وبلىستىق كەزەڭنەڭ دە ولجالى شىقتى. وزدەرىنىڭ تابىستارىنا قۋانعان شاكىرت پەن ۇستازى تاعى دا شادىمان شاتتىقتا كەلە جاتتى. قالادا قار جاۋىپ تۇر ەدى. "ءبىز تابىسقا جەتكەن كۇنى قار جاۋىپ تۇردى-اۋ، - دەپ ويلادى بايانباەۆا. - ءبىزدىڭ تابىسىمىزعا تابيعات انانىڭ ءوزى دە قۋانىپ تۇرعان سەكىلدى". اپپاق ۇلپا قار تۇيىرشىكتەرى ۇستاز بەن شاكىرتتىڭ يىعىنا كەلىپ قوناقتايدى. وسى كەزدە بايانباەۆا شاكىرتىنە: "ايانا! سەنىڭ ماماڭا بارامىز! ماماڭنان بارىپ ءسۇيىنشى سۇرايمىز!" - دەدى. سۇيىكتى اناسىنىڭ اتىن ۇستازىنىڭ اۋزىنان ەستىگەندە ايانا قۋانىپ كەتتى.

ايانانىڭ اكەسى ايانانىڭ كىشكەنتاي كۇنىندە دۇنيەدەن وزىپ كەتكەن ەدى. ءوزىن ۇنەمى كوتەرىپ، ەركەلەتىپ جۇرەتىن سۇيىكتى اكەسىنىڭ ءجۇزى ايانانىڭ كوز الدىندا ەمىس-ەمىس قانا ساقتالىپ قالىپتى. ايانانىڭ اكەسى قايتىس بولعاننان كەيىن، "جىعىلعان ۇستىنە جۇدىرىق" دەگەندەي، ايانانىڭ ماماسى اۆتوموبيل اپاتىنا ۇشىراپ، ءبىر اياعىن تىزەدەن كەستىرىپ، پروتەزدىڭ كومەگىنە سۇيەنىپ قالعان ەدى. ءبىراق قايسار ايەل مويىعان جوق. سۇيىكتى قىزى ايانانى جەتكىزۋ ءۇشىن بارىن سالدى. بەرتىن كەلە كاسىپكەرلىككە دەن قويىپ، وزىنە شاعىن دۇكەن اشىپ الىپ، سوندا جۇمىس ىستەيتىن.

- بۇگىن راۋشان جوق شىعار، - دەدى ايانا ۇستازىنا الگىندە عانا بولعان قۋانىشتان ءالى دە ءجۇزى بال-بۇل جانا قاراپ. - راۋشان جۇمىستارى بولىپ سۇرانىپ كەتكەن بولۋى كەرەك. دۇكەندە مامامنىڭ ءوزى تۇرعان شىعار.

ايانانىڭ راۋشان دەپ وتىرعانى - وسى قالادان ارناۋلى ورتا ءبىلىمدى زاڭگەر ماماندىعى بويىنشا كوللەدج بىتىرگەن، اۋىلدان كەلگەن جاس قىز ەدى. ازىرگە جۇمىس تابىلماي، ءبىلىمىمدى كەيىن جالعاستىرامىن دەپ جۇرگەن راۋشاندى ايانانىڭ ماماسى ءوزىنىڭ دۇكەنىنە بىرگە جۇمىس ىستەۋگە شاقىرعان. دۇكەندە كوبىنە راۋشان تۇراتىن. ءارى راۋشان ايانالارمەن بىرگە تۇرادى. راۋشان مەن ايانا تۋرا ءبىر اپكەلى-سىڭلىلى جاندارداي بولىپ كەتكەن.

ۇستاز بەن شاكىرت ايانانىڭ ماماسىنىڭ دۇكەنىنە جاقىنداپ كەلە جاتتى. "ايانا" دۇكەنى. ايانا ءاردايىم ماڭدايشاداعى وسى ءبىر جازۋدى وقىعان سايىن، ءوزىنىڭ ەسىمىن ماڭدايشاعا جازىپ قويعان اناسىنا مىڭ العىس ايتاتىن.

ۇستاز بەن شاكىرت دۇكەن ىشىنە قول ۇستاسىپ كىرىپ كەلگەندە، دۇكەن ىشىندە ساتىپ الۋشىلار جوق كەزى ەدى. وزدەرىنە ايانانىڭ ماماسى نازارىن سالىپ قاراي بەرگەندە، ۇستاز بەن شاكىرت قوسارلانا: "ءبىز جەڭدىك!" دەدى. ايەل جەڭىسكە جەتكەن قىزىن قۇشاقتاپ سۇيمەككە سورەنى اينالىپ وتپەك بولىپ، ۇمسىنا بەرگەندە، ايانا:

- ماما!.. مەن ءوزىم!.. - دەدى دە، جۇگىرە باسىپ بارىپ، سورەنى اينالىپ ءوتىپ، اناسىن قۇشاقتادى. انا مەن قىزىنىڭ قۋانىشىنا بايانباەۆانىڭ جۇرەگى ەلجىرەدى. "شىركىن، ادامداردىڭ ءبارى وسىلاي قۋانسا عوي!" دەپ ويلادى بايانباەۆا.

انا مەن قىز شۇيىركەلەسىپ جاتقاندا، بايانباەۆا دۇكەن ىشىندەگى سورەدە تۇرعان زاتتارعا ءبىر ءسات نازارىن اۋدارعان ەدى. ءبىر كەزدە ارتىنا بۇرىلىپ قاراعاندا ماماسىنىڭ جانىندا كىشكەنتاي بالاشا ەركەلەپ شوكولاد جەپ تۇرعان ايانانى كوردى. مىناۋ الگىندە عانا مىقتى دەگەن مەكتەپتەردىڭ مىقتى دەگەن شاكىرتتەرىن ارتقا تاستاعان ايانا ما؟ بايانباەۆا شاكىرتىنە قاراپ ك ۇلىمسىرەدى. كوڭىلى بوسادى. ءبىراق بايانباەۆانىڭ ءدال ءقازىر بوسانسۋعا قاقىسى جوق ەدى. ويتكەنى سۇيىكتى شاكىرتىنىڭ وزىنە دەگەن ءۇمىتى مەن سەنىمىنە قوسا، الدا ولاردى تاعى دا ءبىر ۇلكەن اسۋ كۇتىپ تۇر ەدى.