استانانىڭ «بارىسى» كونتينەنتالدى حوككەي ليگاسىنىڭ (كحل) تۇراقتى چەمپيوناتىنداعى سىرتقى ماچتا ماگنيتوگورسكىنىڭ «مەتاللۋرگىنەن» جەڭىلىس تاپتى. ماگنيتوگورسكىدە وتكەن كەزدەسۋ 3:0 ەسەبىمەن الاڭ يەلەرىنىڭ جەڭىسىمەن اياقتالدى، دەپ حابارلايدى infohub.kz سايتى.
ويىننىڭ تاعدىرى ءبىرىنشى كەزەڭدە-اق شەشىلگەندەي بولدى. «مەتاللۋرگ» حوككەيشىلەرى جەتى مينۋت ىشىندە استانالىق كوماندانىڭ قاقپاسىنا ءۇش شايبا سوقتى.
قازاقستان قۇراماسىنىڭ شابۋىلشىسى نيكيتا ميحايليس سوققان ءۇشىنشى شايبادان كەيىن «بارىستىڭ» باس باپكەرى ميحايل كراۆەس قاقپاشى حانتەر شەپاردتى اۋىستىرۋعا شەشىم قابىلدادى. ونىڭ ورنىنا الاڭعا اندرەي شۋتوۆ شىقتى.
ەكىنشى جانە ءۇشىنشى كەزەڭدەردە قازاقستاندىق كلۋب ايىرماشىلىقتى قىسقارتا المادى. الاڭ يەلەرى دە كوزگە تۇسپەدى، ءۇش شايبالىق باسىمدىقتى سوڭعى ىسقىرىققا دەيىن ساقتاپ قالدى.
وسىلايشا، «بارىس» 0:3 ەسەبىمەن قۇرعاق جەڭىلىسكە ۇشىرادى.
استانالىق كوماندا كەلەسى ماچىن 20 قىركۇيەكتە ياروسلاۆلدە جەرگىلىكتى «لوكوموتيۆكە» قارسى وتكىزەدى. كەزدەسۋ 19:00-دە باستالادى.