استانالىق «بارىس» حوككەي كلۋبى سانكت-پەتەربۋرگتە ءوتىپ جاتقان نيكولاي پۋچكوۆ مەموريالىنىڭ ەكىنشى تۋرىندا سكا-ۆمف كومانداسىنان بۇلليتتەر سەرياسىندا 1:2 ەسەبىمەن جەڭىلىس تاپتى. نەگىزگى ۋاقىت پەن وۆەرتايم 1:1 ەسەبىمەن تەڭ اياقتالدى، دەپ حابارلايدى infohub.kz سايتى.
ءتۋرنيردىڭ سكا-عا قارسى العاشقى ويىنىندا استانالىقتار ءۇشىنشى كەزەڭنىڭ سوڭىندا ۆسەۆولود لوگۆيننىڭ شايباسى ارقىلى ەسەپتى تەڭەستىرگەن ەدى – 1:1، الايدا بۇلليتتەر سەرياسىندا اسكەرلىكتەر باسىم ءتۇستى – 2:0. ەكىنشى ماچتە دە تاريح قايتالاندى.
28 تامىزدا وتكەن ەكىنشى تۋر كەزدەسۋى سكا-ۆمف پايداسىنا 2:1 ەسەبىمەن اياقتالدى (بۇلليتتەر 1:0). 29-مينۋتتا «بارىس» تۋرنيردەگى ەكىنشى شايباسىن سالدى: تايس تومپسون، دەي لوگان جانە كيريلل لياپۋنوۆ گول ۇيىمداستىردى، ونى لياپۋنوۆ اياقتادى. ەكىنشى كەزەڭنىڭ اياقتالۋىنا 13 سەكۋند قالعاندا نيكيتا سۋرايەۆ ساندىق ارتىقشىلىقتى پايدالانىپ، ەسەپتى تەڭەستىردى – 1:1.
ميحايل كراۆەس باستاعان «بارىس» باپكەرلەر شتابى ءبىرىنشى ماچتەن ايىرماشىلىعى، ۆحل كومانداسىمەن ويىنعا لەگيونەرلەردىڭ كوپ بولىگىن قوسپادى. حانتەر شەپاردتىڭ ورنىنا قاقپانى اندرەي شۋتوۆ قورعادى. قازاقستاندىقتار تىرىستى، ءبىراق ماچ قايتادان وۆەرتايمعا، سودان كەيىن بۇلليتتەر سەرياسىنا ءوتتى، وندا شۋتوۆتى ۆلاديسلاۆ نۋرەك اۋىستىردى.
الايدا ساتتىلىك استانالىقتاردان تاعى دا باس تارتتى: باتىرلان مۇراتوۆ، اسانالي ساركەنوۆ جانە تايس تومپسون قوجايىنداردىڭ قاقپاشىسى دەنيس پوپوۆتى الا المادى. ال ماكسيم كازاكوۆ نۋرەكتىڭ قاقپاسىنا شايبا سالدى. ناتيجە – سكا-ۆمف پايداسىنا 2:1.
بۇگىن كەشكە سكا ءبىرىنشى تۋردا سكا-ۆمف-تى 2:1 ەسەبىمەن ۇتقان «ادميرالمەن» وينايدى. جەڭىمپازدار مەن جۇلدەگەرلەر ەرتەڭ «بارىس» – «ادميرال» جانە سكا – سكا-ۆمف ماچتارىنان كەيىن انىقتالادى.
ءداستۇرلى ماۋسىم الدىنداعى تۋرنير سانكت-پەتەربۋرگتىك سكا، ماسكەۋ ءاام، سسكا، «دينامو» جانە كسرو قۇراماسىنىڭ اتى اڭىزعا اينالعان قاقپاشىسى، 1956 جىلعى وليمپيادا چەمپيونى نيكولاي پۋچكوۆتىڭ ەسىمىنە ارنالعان. مەموريال 2014 جىلى قايتا جانداندىرىلدى، ال بۇعان دەيىن 1999-2008 جىلدارى وتكىزىلگەن. ءتۇرلى ۋاقىتتا تۋرنيرگە ماسكەۋدىڭ «ديناموسى»، قازاننىڭ «اك بارسى»، چەرەپوۆەستىڭ «سەۆەرستالى»، ءنوۆوسىبىردىڭ «ءسىبىرى» جانە باسقا دا كلۋبتار قاتىسقان. تۋرنير تاريحىندا قوجايىندار سەگىز رەت جەڭىسكە جەتكەن، فيندىك «يوكەريت» – ەكى رەت، ومبىنىڭ «اۆانگاردى» مەن ەكاتەرينبۋرگتىڭ «ءاۆتوموبيليسى» ءبىر-بىر رەت جەڭگەن.