قازاقستاندىق ەركىن كۇرەس شەبەرى بەكاسىل اسامبەك جاستار اراسىنداعى كۇرەس تۇرلەرىنەن الەم چەمپيوناتىندا كۇمىس جۇلدەگەر اتاندى. فينالدا ول امەريكالىق اارون دجەيمس سەيدەلدەن 0:7 ەسەبىمەن ۇتىلىپ قالدى. سپورتشى 61 كەلىگە دەيىنگى سالماق دارەجەسىندە ونەر كورسەتتى... دەپ حابارلايدى infohub.kz سايتى.
فينالعا دەيىن اسامبەك جۇڭگو، ۋكراينا جانە رەسەي بالۋاندارىن تىزە بۇكتىرىپ، ءۇش كەزدەسۋدە دە 10:0 ەسەبىمەن باسىم ءتۇستى. جارتىلاي فينالدا قازاقستاندىق جاپوندىق يسۋكي يوناشيرومەن كەزدەسىپ، تارتىستى باسەكەدە 3:1 ەسەبىمەن جەڭىسكە جەتتى.
سول كۇنى 68 كەلىگە دەيىنگى سالماقتا قازاقستاندىق سپورتشى ۋلدانا تيلەۋحان قولا جۇلدەنى قانجىعاسىنا بايلادى. ول ءۇشىنشى ورىن ءۇشىن وتكەن بەلدەسۋدە ۋكراينالىق الەكساندرا رىباكتى 4:2 ەسەبىمەن ۇتتى.
وسىعان دەيىن براتيسلاۆاداعى تۋرنيردە قازاقستاننىڭ جالعىز مەدالى گرەك-ريم كۇرەسىنەن 67 كەلىدە سىنعا تۇسكەن قىزىبەك قالماعامبەتوۆتىڭ التىنى بولاتىن.
حالىقارالىق كۇرەس فەدەراسياسىنىڭ (UWW) قولداۋىمەن ءوتىپ جاتقان الەم بىرىنشىلىگى سلوۆاكيا استاناسىندا وتۋدە. وعان 700 جاس سپورتشى قاتىسىپ، كۇرەستىڭ ءۇش تۇرىنەن — گرەك-ريم، ەركىن جانە ايەلدەر كۇرەسىنەن — 120 جۇلدە جيىنتىعىن ساراپقا سالۋدا.
بۇل جارىستا قازاقستان نامىسىن 30 سپورتشى قورعاپ جاتىر: 20 جىگىت جانە 10 قىز. تۋرنير 23 تامىزدا اياقتالادى.