اعىلشىندىق «بەرنلي» كلۋبىنىڭ باس باپكەرى نيكي حايەن چەمپيونشيپتىڭ ءتورتىنشى تۋرىندا «ميدلسبرو»-مەن وتكەن ويىننان (1:1) كەيىن قازاقستاندىق شابۋىلشى داستان ساتپاەۆتىڭ جاي-كۇيىنە قاتىستى پىكىر ءبىلدىردى. ماماننىڭ ايتۋىنشا، فۋتبولشى كەزدەسۋدىڭ سوڭىندا ىڭعايسىزدىق سەزىنگەن، الايدا الدىن الا ايتقاندا، بۇل — بۇلشىقەتتىڭ تارتىلۋى، اۋىر جاراقات ەمەس، دەپ حابارلايدى infohub.kz سايتى.
18 جاستاعى ساتپايەۆ «بەرنلي» ساپىندا قاتارىنان ءۇشىنشى رەت نەگىزگى قۇرامدا الاڭعا شىعىپ، 81-مينۋتتا اۋىستىرىلدى. الاڭنان شىعىپ بارا جاتىپ، قازاقستاندىق جامباسىنىڭ ارتقى بەتىن ۇستاپ تۇردى. «تەرف مۋر» تريبۋنالارى ونى تۇرىپ قوشەمەتتەدى، ال كەزدەسۋدەن كەيىن ساتپايەۆ ماچتىڭ ۇزدىك ويىنشىسى دەپ تانىلدى.
ويىننان كەيىن حايەن داستاننىڭ جاي-كۇيىن مەديسينالىق شتاب قوسىمشا باعالايتىنىن ايتتى.
«بىزگە تەكسەرۋ جۇرگىزۋ كەرەك. ونىڭ اياعى جاي عانا تارتىلىپ قالعان سياقتى. ول جاقسى ويىن كورسەتتى. مەن ول ءۇشىن وتە قۋانىشتىمىن جانە 18 جاستاعى جىگىتتىڭ كومانداداعى باسقا فۋتبولشىلارعا ۇلگى بولاتىنىنا قۋانىشتىمىن»، – دەدى حايەن Sports24.kz-كە بەرگەن سۇحباتىندا.
«بەرنلي» باس باپكەرى قازاقستاندىقتىڭ بەرىلگەندىگىن ەرەكشە اتاپ ءوتتى. ونىڭ ايتۋىنشا، جاس شابۋىلشى ەڭبەكقورلىعى مەن الاڭنان تىس مىنەز-قۇلقىنىڭ ارقاسىندا كوماندا ىشىندە قۇرمەتكە يە بولعان.
«جالپى، داستان ۇلكەن ىقىلاس تانىتتى، ويىنعا بەلسەندى قاتىستى، بىرنەشە ءقاۋىپتى ءسات جاسادى. كومانداداعىلاردىڭ ءبارى ونى قۇرمەتتەيدى، ونىڭ قانشالىقتى قاراپايىم ەكەنىن... جاي عانا وتە جاقسى، دوستىقشىل جىگىت. ول تىنىمسىز ەڭبەكتەنىپ، فۋتبول الاڭىندا ايىرماشىلىق جاساۋعا تىرىسادى»، – دەپ اتاپ ءوتتى حايەن.
سونىمەن قاتار، باس باپكەر ساتپاەۆتىڭ انگلياعا كوشكەننەن كەيىن كەزدەسكەن فيزيكالىق جۇكتەمەلەرگە توقتالدى. حايەن چەمپيونشيپتىڭ قاتالدىعىن اتاپ ءوتىپ، باپكەرلىك شتاب 18 جاستاعى فۋتبولشىعا ۇقىپتى قاراۋعا تىرىساتىنىن مويىندادى.
«ءيا، ول بەيىمدەلۋدە. ءبىراق ءسىز انگليادا ليگانىڭ وتە قاتال، برۋتالدى ەكەنىن بىلەسىز، سوندىقتان ءبىز ونى قورعاۋعا دا تىرىسامىز. ءارقاشان بۇل وڭايعا سوقپايدى».
حايەننىڭ ايتۋىنشا، قازىرگى ۋاقىتتا ساتپاەۆتا اۋىر جاراقات بەلگىلەرى جوق، دەگەنمەن ونىڭ جاي-كۇيىن باعالاعاننان كەيىن عانا تۇپكىلىكتى قورىتىندى جاساۋعا بولادى.
«وندا ازداعان زاقىم بار، بۇل — بۇلشىقەتتىڭ تارتىلۋى، ءبىراق ءبىز اۋىر زارداپتارسىز وتەدى دەپ ۇمىتتەنەمىز. ەشكىم بۇل سوزىلمالى جاراقات بولعانىن قالامايدى. ونىڭ 90 مينۋت ويناعانىن كورەسىز، بۇل تاجىريبەلى ويىنشىلارعا دا وڭاي ەمەس، جاس فۋتبولشىعا ايتپاسا دا».
ەسكە سالا كەتەيىك، «بەرنلي» مەن «ميدلسبرو» تەڭ وينادى – 1:1. ءبىرىنشى تايمدا ەيدان ءمورريستىڭ گولىنا ءۇي يەلەرى 54-مينۋتتا ۋگو راگۋبەردىڭ دوبىمەن جاۋاپ بەردى. ءتورت تۋردان كەيىن حايەننىڭ كومانداسى ەكى ۇپاي جيناپ، چەمپيونشيپتە 23-ورىندا تۇر.