اقش-تىڭ سەنت-لۋيس قالاسىندا ءوتىپ جاتقان ايەلدەر اراسىنداعى Cairns Cup-2026 سۋپەرتۋرنيرىنىڭ سەگىزىنشى تۋرىندا قازاقستاندىق گروسسمەيستەر بيبيسارا اساۋباەۆا قارامەن ويناپ، قىتايدان كەلگەن 16-دۇنيەجۇزىلىك چەمپيون تان چجۋنيدان جەڭىلىس تاپتى. وسى تۋردان كەيىن اساۋباەۆا امەريكاندىق كاريسسا ييپپەن ءۇشىنشى ورىندى ءبولىسىپ تۇر، دەپ حابارلايدى infohub.kz سايتى.
22 جاستاعى اساۋباەۆانىڭ تۋرنير كەستەسىندە كوش باستاپ تۇرعان تان چجۋنيمەن ويىنى ورىنداردى بولۋدە شەشۋشى مانگە يە بولدى. 2017-2018 جىلدارى شاحمات ءتاجىن يەلەنگەن 35 جاستاعى قىتايلىقتىڭ تاجىريبەسى شەشۋشى ءرول اتقاردى.
قازاقستاندىق شاحماتشى قارامەن وتكىر قارسى ويىن جۇرگىزىپ، اتاقتى قارسىلاسىن قارسى قوزعالىستا ۇستاۋعا تىرىستى. اساۋباەۆانىڭ بوساعان پەشكاسى ءۇشىنشى گوريزونتالعا جەتتى، الايدا قىتايلىقتىڭ قاراما-قارسى فلانگتاعى مات قاۋىپتەرى باسىم بولىپ شىقتى. ناتيجەسىندە چۋنسين تۋماسى 48ء-شى جۇرىستە جەڭىسكە جەتتى.
بۇل جەڭىلىستەن كەيىن اساۋباەۆا ەكىنشى ورىندى امەريكاندىق ەليس ليگە بەردى. ول قارامەن الەمدىك تاجگە ۇمىتكەر ءۇندىستاندىق ۆايشالي رامەشبابانى ۇتتى.
بيبيسارامەن ءۇشىنشى ورىندى تاعى ءبىر امەريكاندىق كاريسسا ييپ بولىسەدى. ول اقپەن گرەك ستاۆرۋلا سولاكيدۋدى جەڭدى. بۇعان دەيىن ييپ پەن اساۋباەۆا جەكە كەزدەسۋىندە جالاڭاش كورولدەرگە دەيىن ويناعان بولاتىن.
توعىزىنشى تۋردا اساۋباەۆا اقپەن ءۇندىستاندىق گروسسمەيستەر حامپي كونەرۋمەن وينايدى. تان چجۋني قارامەن سولاكيدۋمەن كەزدەسسە، لي مەن ييپ امەريكاندىق دەربيدە ب ا ق سىنايدى.
جۇلدە قورى 250 000 دوللاردى قۇرايتىن بەدەلدى ايەلدەر سۋپەرتۋرنيرى Cairns Cup اقش شاحماتىنىڭ مەككەسى اتالاتىن سەنت-لۋيستە وتۋدە.
تۋرنير سەنت-لۋيس شاحمات كلۋبىنىڭ نەگىزىن قالاۋشىلاردىڭ ءبىرى، الەمدىك شاحمات داڭق زالىنىڭ مۇشەسى دجينن كەرنس سينكفيلدتىڭ قۇرمەتىنە اتالعان.
ارنايى شاقىرتۋ العان ون شاحماتشى ءبىر اينالىمدا وينايدى. ۋاقىت باقىلاۋى — كلاسسيكالىق. ۇپايلار تەڭ بولعان جاعدايدا جىلدام شاحمات فورماتىندا پلەي-وفف قاراستىرىلعان.
سەنت-لۋيستە قاتار ەرلەر اراسىنداعى Sinquefield Cup-2026 ءتۋرنيرى دە وتۋدە. ول دا دجينن كەرنس سينكفيلدتىڭ قۇرمەتىنە اتالعان. جۇلدە قورى 475 000 دوللاردى قۇرايتىن بۇل تۋرنيرگە اساۋباەۆانىڭ جىگىتى جاۆوحير سينداروۆ قاتىسۋدا. سەگىزىنشى تۋردا وزبەك گروسسمەيستەرى قاتارىنان ەكىنشى جەڭىسىنە قول جەتكىزدى، ال ونىڭ قارسىلاسى نيدەرلانديالىق يوردەن ۆان فورەست 56-شى جۇرىستە بەرىلدى.