شىمكەنتتىڭ «بييك-شىمكەنت» ايەلدەر فۋتبول كلۋبى 2026 جىلعى قازاقستان ايەلدەر ليگاسىنىڭ جەڭىمپازى اتاندى. وسىلايشا كوماندا تيتۋل سانى بويىنشا رەكوردتى جاڭارتتى، دەپ حابارلايدى infohub.kz سايتى.
تۇراقتى چەمپيوناتتا شىمكەنتتىك قىزدار 16 ويىندا جەڭىسكە جەتىپ، ءبىر رەت قانا ۇتىلدى. جالپى دوپ ايىرماسى 135:5 بولدى. وسى ناتيجە «بييك-شىمكەنتكە» ا كونفەرەنسياسىندا ءبىرىنشى ورىندى يەلەنىپ، پلەي-وففقا شىعۋعا مۇمكىندىك بەردى.
جارتىلاي فينالدا شىمكەنتتىكتەر استانالىق «جەڭىستى» 5:0 ەسەبىمەن تىزە بۇكتىردى. شەشۋشى ماچتا تاعى ءبىر ءىرى جەڭىسكە قول جەتكىزىلدى — تۇركىستاندىق «تۇراندى» 3:0 ەسەبىمەن ۇتتى.
وسىلايشا «بييك-شىمكەنت» 14ء-شى رەت قازاقستان چەمپيونى اتاندى. كوماندا وتكەن ماۋسىمدا «اقتوبەنىڭ» يەلەنگەن تيتۋلىن قايتارىپ الدى.
«تۇران» چەمپيوناتتى كۇمىس مەدالمەن اياقتادى. قولا جۇلدە ءۇشىنشى ورىن ءۇشىن ماچتا «جەڭىستى» 2:0 ەسەبىمەن جەڭگەن «اقتوبە» فۋتبولشىلارىنا بۇيىردى.
ماۋسىمنىڭ ۇزدىك مەرگەنى «اقتوبەنىڭ» قازاقستاندىق شابۋىلشىسى الينا ليتۆينەنكو بولدى، ول 49 دوپ سوقتى. ەڭ كوپ گولدىق پاس ونىڭ كوماندالاسى — جاپوندىق جارتىلاي قورعاۋشى اياكا كاميمۋرانىڭ ەنشىسىندە (20).