قازاقستاندا ازاماتتاردىڭ كەزەكسىز جانە كوشى-قون قىزمەتى ماماندارىنىڭ قاتىسۋىنسىز پاسپورت پەن جەكە كۋالىك راسىمدەۋىنە مۇمكىندىك بەرەتىن پيلوتتىق جوبا ىسكە قوسىلادى. بۇل حقكو-دارعا ورناتىلاتىن بيومەتريالىق تەرمينالداردىڭ ارقاسىندا مۇمكىن بولادى، دەپ حابارلايدى infohub.kz سايتى.
ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەن ىشكى ىستەر مينيسترلىگىنىڭ بىرلەسكەن بۇيرىعى «ادىلەت» اجج سايتىندا جاريالاندى. قۇجات «بيومەتريالىق قۇجاتتاندىرۋ تەرمينالى» كەشەنىن پايدالانا وتىرىپ، ق ر ازاماتتارىنا پاسپورتتار مەن جەكە كۋالىكتەر بەرۋ» مەملەكەتتىك قىزمەتىن كورسەتۋ ءتارتىبىن رەتتەيدى.
تەرمينالدار استانا، الماتى، شىمكەنت قالالارىنداعى، وبلىس ورتالىقتارىنداعى جانە بايقوڭىرداعى «ازاماتتارعا ارنالعان ۇكىمەت» فرونت-وفيستەرىندە ورناتىلادى. ولاردى 28 تامىزدان باستاپ پايدالانۋعا بولادى.
ماڭىزدى شارت: تەرمينال ارقىلى جەكە كۋالىكتى تەك ونىڭ قولدانىلۋ مەرزىمى اياقتالعان جاعدايدا عانا الۋعا بولادى. بۇل رەتتە قىزمەت قولدانىلۋ مەرزىمىنىڭ اياقتالۋىنا 30 كۇنتىزبەلىك كۇننەن اسپايتىن ۋاقىت قالعاندا نەمەسە مەرزىم 10 كۇننەن اسپايتىن ۋاقىتقا وتكەندە عانا قولجەتىمدى. باسقا جاعدايلاردا جۇيە ءوتىنىش بەرۋشىگە حقكو-عا جۇگىنۋ قاجەتتىگى تۋرالى حابارلايدى.