بريتاندىق وقۋشى قىز بودحانا سيۆاناندان 11 جاسىندا الەمدىك رەكورد ورناتىپ، شاحمات تاريحىنداعى ەڭ جاس ايەل گروسسمەيستەر (WGM) اتاندى. بۇل اتاققا قاجەتتى ناتيجەنى ول سامارقاندتا وتكەن دۇنيەجۇزىلىك شاحمات وليمپياداسىندا كورسەتتى، دەپ حابارلايدى infohub.kz سايتى.
وليمپيادادا سيۆاناندان انگليا قۇراماسى ساپىندا ويناپ، بارلىق 11 پارتيانى ءبىرىنشى تاقتادا وتكىزىپ، 8 ۇپاي جينادى. بۇل ناتيجە گروسسمەيستەر اتاعىن الۋعا جەتكىلىكتى بولدى. سول كەزدە ونىڭ رەيتينگى 2300-دەن اسقان ەدى.
بۇعان دەيىنگى رەكورد كاتەرينا لاگنوعا، ودان بۇرىن حوۋ يفانعا تيەسىلى بولعان. ەكى شاحماتشى دا ايەل گروسسمەيستەر اتاعىن 12 جاسىندا العان.
ايتا كەتەيىك، WGM تيتۋلى قىز ءۇشىن تاعى ءبىر اۋىز تولتىرىپ ايتارلىقتاي جەتىستىك قانا بولدى. وتكەن جىلى 10 جاسىندا ول گروسسمەيستەردى جەڭگەن ەڭ جاس شاحماتشى اتاندى. ال شىلدەدە ول حالىقارالىق شەبەردىڭ العاشقى نورماسىن ورىنداپ، سول كەزدە مۇنى ءبىرىنشى بولىپ باعىندىرعان ەڭ جاس ايەل بولدى.
اتاپ وتسەك، بودحانا شاحماتقا كوروناۆيرۋس پاندەمياسى كەزىندە كەلىپ، ءوز بەتىنشە ويناۋدى ۇيرەنگەن. 2021 جىلدىڭ شىلدەسىندە ول ۇلىبريتانيانىڭ ەڭ كونە شاحمات كلۋبتارىنىڭ ءبىرى — حارروۋ كلۋبىندا العاشقى ءتۋرنيرىن وينادى. ءبىر جىلدان كەيىن، جەتى جاسىندا، ول مەكتەپ وقۋشىلارى اراسىنداعى ەۋروپا چەمپيوناتىندا بارلىق 24 پارتيانى ۇتىپ الدى.
2023 جىلى سيۆاناندان رەسمي پارتيادا گروسسمەيستەرمەن تەڭ تۇسكەن ەڭ جاس ويىنشى اتاندى. تاعى ءبىر جىلدان كەيىن، توعىز جاسىندا، ول انگليا قۇراماسى ساپىندا شاحمات وليمپياداسىندا العاش رەت ونەر كورسەتتى. سول كەزدە ول كەز كەلگەن سپورت تۇرىنەن حالىقارالىق جارىستاردا ەل نامىسىن قورعاعان ەڭ جاس ويىنشى بولدى. سونىمەن قاتار قىز مەكتەپتە وقۋىن جالعاستىرىپ، ءبىر مەزگىلدە حالىقارالىق تۋرنيرلەرگە قاتىسىپ ءجۇر.
بۇعان دەيىن Kursiv LifeStyle قازاقستان ايەلدەر شاحماتىن دامىتقانى ءۇشىن FIDE ناگراداسىن العانىن جازعان بولاتىن.