قازاقستاندىق تەننيسشى الەكساندر بۋبليك الەمدىك رەيتينگتە تومەندەۋدى جالعاستىرۋدا. بۇگىن جاريالانعان كاسىبي تەننيسشىلەر قاۋىمداستىعىنىڭ (اتپ) سوڭعى رەيتينگىنە سايكەس، ول 16-ورىندا تۇر. مونرەال مەن سينسينناتي تۋرنيرلەرىن وتكىزىپ جىبەرگەن سپورتشى وتكەن اپتامەن سالىستىرعاندا بەس ساتىعا تومەندەدى، دەپ حابارلايدى infohub.kz.
سونىمەن قاتار، اقش اشىق چەمپيوناتى-2026 ميكستىندەگى پەرسپەكتيۆالى جۇپ تارادى. ۆينۋس ۋيليامس پەن الەكساندر بۋبليكتىڭ دۋەتى بۇگىن تۇندە باستالاتىن ارالاس جۇپتا ونەر كورسەتپەيدى. 46 جاستاعى امەريكالىق تەننيسشى تۋرنير باستالار الدىندا جاراقات العان. ايتا كەتەيىك، ونىڭ قارىنداسى، 44 جاستاعى سەرەنا ۋيليامس ميكستكە يسپاندىق كارلوس الكاراسپەن جۇپ قۇرىپ قاتىسادى.
جۇلدە قورى ءبىر ميلليون دوللاردى قۇرايتىن ميكستكە ەلەنا رىباكينا دا قاتىسپايدى، ول سينسينناتي تۋرنيرىندە احيللەس ءسىڭىرىن جاراقاتتاعان. الەمنىڭ ەكىنشى راكەتكاسى جەكە سىندا ونەر كورسەتە الا ما، بۇل US Open-2026 جەرەبەسى وتەتىن 27 تامىزعا دەيىن بەلگىلى بولادى.
بۇل اپتادا اتپ-تىڭ 250 ساناتىنداعى جالعىز ءىرى تۋرنير — امەريكاندىق ۋينستون-سەيلەمدە وتەدى. قازاقستاندىق تەننيسشىلەر وعان قاتىسپايدى. بۋبليك، الەكساندر شەۆچەنكو جانە ءبىزدىڭ جاسوسپىرىمدەر مەيدجورعا جاتتىعۋ پروسەسى ارقىلى دايىندالعاندى ءجون كورەدى.
اقش اشىق تەننيس چەمپيوناتى — قاتتى كورتتا وتەتىن جىل سايىنعى «ۇلكەن دۋلىعا» ءتۋرنيرى، كۇنتىزبەلىك جىلداعى ءتورت مەيدجوردىڭ سوڭعىسى. ءداستۇر بويىنشا، US Open تامىزدىڭ سوڭعى دۇيسەنبىسىندە باستالادى. الايدا، ەكىنشى جىل قاتارىنان جارىس ميكست ءتۋرنيرىنىڭ اۋىستىرىلۋىنا بايلانىستى ءبىر اپتا بۇرىن باستالادى.
US Open-2026 23 تامىز بەن 13 قىركۇيەك ارالىعىندا وتەدى. جالپى جۇلدە قورى 108 ميلليون دوللاردى قۇرايدى، بۇل «ۇلكەن دۋلىعا» تۋرنيرلەرى ءۇشىن رەكوردتىق كورسەتكىش. تۋرنير العاش رەت 1881 جىلدىڭ تامىزىندا وتكەن. بەس نەگىزگى رازريادتان باسقا، جارىس اياسىندا ارداگەرلەر، جاسوسپىرىمدەر جانە ارباداعى تەننيسشىلەر اراسىندا دا ماچتار وتكىزىلەدى. 1978 جىلدان باستاپ ماچتار نيۋ-يوركتەگى كۋينس، فلاشينگ-مەدوۋز-كورونا ساياباعىنداعى بيللي دجين كينگ اتىنداعى ۇلتتىق تەننيس ورتالىعىندا وتەدى.
نەگىزگى رازريادتارداعى قازىرگى چەمپيوندار — جوعارىدا اتالعان كارلوس الكاراس پەن بەلارۋس ارينا سوبولەنكو.