قازاقستاندىق تەننيسشى الەكساندر بۋبليك (16) اقش اشىق چەمپيوناتىنىڭ ءۇشىنشى اينالىمىنا سەنىمدى جولداما الدى. ول ەكىنشى راۋندتا فرانسۋز ادريان ماننارينونى (67) 6:3، 6:1، 6:1 ەسەبىمەن جەڭدى، دەپ حابارلايدى infohub.kz.
ماچ نەبارى 1 ساعات 20 مينۋتقا سوزىلدى. بۋبليك ويىندى تولىق باقىلاۋدا ۇستادى، اسىرەسە ءوز پوداچاسىندا تاماشا ونەر كورسەتتى. قازاقستاندىق تەننيسشى ءۇش قوس قاتەلىك جاساعانىمەن، 16 ەيس سوقتى. ال ونىڭ قارسىلاسى نەبارى ءبىر رەت ەيسپەن ۇپاي الدى.
بۋبليكتىڭ ءبىرىنشى پوداچانىڭ دالدىگى 73 پايىزدى قۇرادى. ول ءبىرىنشى دوپتاعى 45 ۇپايدىڭ 41ء-ىن جەڭىپ الدى (91%). ماننارينونىڭ بۇل كورسەتكىشى ايتارلىقتاي تومەن بولدى — ءبىرىنشى پوداچاداعى روزىگرىشتاردىڭ تەك 53 پايىزىن ۇتىپ الدى.
قازاقستاندىق تەننيسشىنىڭ باسىمدىعى قابىلداۋ كەزىندە دە ايقىن بايقالدى. بۋبليك قارسىلاسىنىڭ پوداچاسىنداعى 64 ۇپايدىڭ 32ء-سىن جەڭىپ، 14 برەيك-پوينتتىڭ التاۋىن رەاليزاسيالادى. ماننارينو بۇكىل ماچ بويى نەبارى ءبىر برەيك-پوينتقا يە بولدى، ونى دا پايدالانا المادى. جالپى ۇپاي اراقاتىناسى بۋبليكتىڭ پايداسىنا 82:44 بولدى.
ءۇشىنشى اينالىمدا الەكساندر بۋبليك امەريكالىق توممي پول مەن حورۆات دينو پريجميچ اراسىنداعى ماچ جەڭىمپازىمەن كەزدەسەدى.
الدىڭعى كۇنى US Open-2026 ەكىنشى اينالىمىنا ەلەنا رىباكينا مەن يۋليا پۋتينسەۆا دا شىقتى. رىباكينا 17 جاستاعى تەيا ءفروديندى سەنىمدى تۇردە ۇتسا، پۋتينسەۆا بەليندا بەنچيچپەن ماچتا كامبەك جاسادى. ال الەكساندر شەۆچەنكو دينو پريجميچتەن بەس سەتتە جەڭىلىپ، ءتۋرنيردى اياقتادى.
اقش اشىق تەننيس چەمپيوناتى — حاردتا وتەتىن جىل سايىنعى «ۇلكەن دۋلىعا» ءتۋرنيرى، كۇنتىزبەدەگى ءتورت مەيدجوردىڭ سوڭعىسى. العاش رەت 1881 جىلى تامىزدا وتكەن US Open قاتارىنان ەكىنشى جىل قاتارىنان ءبىر اپتا بۇرىن باستالادى، سەبەبى ميكست ءتۋرنيرى باسقا ۋاقىتقا اۋىستىرىلدى. جالپى جۇلدە قورى — 108 ميلليون دوللار — مەيدجورلار اراسىندا رەكوردتىق كورسەتكىش.
1978 جىلدان بەرى ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىنداعى قازىرگى چەمپيون — يسپانيالىق كارلوس الكاراس (3). ول بىلتىرعى فينالدا ياننيك سيننەردى 6:2، 3:6، 6:1، 6:4 ەسەبىمەن جەڭگەن ەدى. ايتپاقشى، يتاليالىق، الەمنىڭ ءبىرىنشى راكەتكاسى، تىزە جاراقاتىنا بايلانىستى US Open-2026-دان باس تارتتى.
ايەلدەر اراسىندا 2025 جىلى بەلارۋس ارينا سوبولەنكو جەڭىمپاز اتاندى. شەشۋشى ماچتا ول امەريكالىق اماندا انيسيموۆانى 6:3، 7:6 (7:3) ەسەبىمەن ۇتتى.