قازاقستاننىڭ ۇزدىك تەننيسشىسى الەكساندر بۋبليك ەلەنا رىباكينانىڭ 2026 جىلعى اقش اشىق چەمپيوناتىنداعى جەڭىسىنە جانە ايەلدەر تەننيس قاۋىمداستىعى (WTA) رەيتينگىندە ءبىرىنشى ورىنعا شىعۋىنا قاتىستى پىكىر ءبىلدىردى. تۋرنير اياقتالعان سوڭ ول ءوزىنىڭ Telegram ارناسىندا قۇتتىقتاۋ جاريالادى، دەپ حابارلايدى infohub.kz سايتى.
«لەنانى، فەدەراسيانى جانە بۇكىل قازاقستاندى جەڭىسپەن جانە رەيتينگتىڭ ءبىرىنشى جولىمەن قۇتتىقتايمىن. بۇل — كوپ جىلدار بويى جاسالعان ۇلكەن ەڭبەك، سەندەر وسى جەڭىستەردىڭ بارىنە لايىقسىڭدار»، — دەپ جازدى بۋبليك.
US Open-2026 فينالىندا رىباكينا ارينا سوبولەنكونى ءۇش سەتتە ۇتتى — 6:4، 5:7، 6:2. قازاقستاندىق تەننيسشى نيۋ-يوركتەگى تۋرنيردە تۇڭعىش رەت چەمپيون اتانىپ، مانسابىنداعى ءۇشىنشى «ۇلكەن دۋلىعا» تيتۋلىن جەڭىپ الدى.
جارتىلاي فينالعا شىققاننان كەيىن-اق رىباكينا WTA رەيتينگىندە كوش باستايتىنىن كەپىلدەندىردى. ول الەمدىك جەكەلەي رەيتينگتى باسقارعان قازاقستاننىڭ تۇڭعىش وكىلى جانە ايەلدەر تۋرى تاريحىنداعى 30-شى ءبىرىنشى راكەتكاسى اتاندى.
بۋبليكتىڭ ءوزى جەكەلەي ءتۋرنيردى ءۇشىنشى اينالىمدا اياقتادى. قازاقستاندىق الدىمەن امەريكاندىق دجەففري ۆۋلفتى (6:4، 6:2، 3:6، 6:1) ۇتتى، كەيىن فرانسۋز ادريان ماننارينونى (6:3، 6:1، 6:1) ويسىراتا جەڭدى.
ءۇشىنشى اينالىمدا بۋبليك امەريكاندىق توممي پولمەن بەس سەتتىك ماچ وتكىزدى. قازاقستاندىق پارتيالار بويىنشا 2:1 ەسەبىمەن الدا تۇردى، ءبىراق سوڭىندا ۇتىلىپ قالدى — 4:6، 6:3، 7:6 (7:4)، 1:6، 3:6. كەزدەسۋ 3 ساعات 13 مينۋتقا سوزىلدى.
بۋبليك سونداي-اق قىتايلىق شان سزيۋنچەنمەن جۇپتىق رازريادتا ونەر كورسەتتى. ءبىرىنشى اينالىمدا ولار سەباستيان باەس پەن فابيان ماروجاندى (6:2، 6:4) ۇتتى، الايدا كەلەسى ماچ الدىندا تۋرنيردەن باس تارتتى.