بۇۇ باس اسسامبلەياسى قازاقستاننىڭ باستاماسىن قولداپ، 22 ءساۋىردى حالىقارالىق كوگالداندىرۋ كۇنى دەپ جاريالادى، دەپ حابارلايدى infohub.kz.
ەكولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتىنىڭ مالىمەتىنشە، بۇۇ باس اسسامبلەياسى قازاقستان ۇسىنعان رەزوليۋسيانى قابىلداپ، 22 ءساۋىردى حالىقارالىق كوگالداندىرۋ كۇنى دەپ جاريالادى. اتاپ وتىلگەندەي، حالىقارالىق كۇندى بەلگىلەۋ تۋرالى باستامانى قازاقستان پرەزيدەنتى قاسىم-جومارت توقايەۆ 2025 جىلعى قىركۇيەكتە بۇۇ باس اسسامبلەياسىنىڭ 80ء-شى سەسسياسىنىڭ جالپى دەباتتارى بارىسىندا كوتەرگەن. رەزوليۋسيانىڭ تەڭ اۆتورلارى 32 مەملەكەت بولدى.
"رەزوليۋسيانىڭ قابىلدانۋى قازاقستاننىڭ جاھاندىق ەكولوگيالىق كۇن ءتارتىبىن ىلگەرىلەتۋگە، قورشاعان ورتانى قورعاۋ، ەكوجۇيەلەردى قالپىنا كەلتىرۋ، جاسىل جەلەكتەردى كەڭەيتۋ جانە ەكولوگيالىق مادەنيەتتى قالىپتاستىرۋ جونىندەگى حالىقارالىق كۇش-جىگەردى بىرىكتىرۋگە قوسقان تۇراقتى ۇلەسىن كورسەتەدى"، - دەپ قوستى مينيسترلىكتە.
ۆەدومستۆونىڭ ايتۋىنشا، قۇجات الەمدىك قوعامداستىقتىڭ كوگالداندىرۋ مەن تابيعي ەكوجۇيەلەردى قالپىنا كەلتىرۋدىڭ ماڭىزدىلىعى تۋرالى حاباردارلىعىن ارتتىرۋعا، سونداي-اق مەملەكەتتەردى، بۇۇ جۇيەسىن، حالىقارالىق جانە ايماقتىق ۇيىمداردى، ازاماتتىق قوعامدى جانە باسقا دا مۇددەلى تاراپتاردى ءتيىستى ءىس-شارالار مەن باستامالار وتكىزۋگە ىنتالاندىرۋعا باعىتتالعان.