چارلز سپەنسەردىڭ قارىنداسى، پرينسەسسا ديانا تۋرالى اسىعا كۇتكەن كىتابىنىڭ ءتورت داناسى نيدەرلاندىدا جۇك كولىگىنەن ۇرلاندى. بۇل تۋرالى infohub.kz سايتى حابارلايدى.
نيدەرلاندى پوليسياسى وقيعاعا قاتىستى تەرگەۋ باستادى. كىتاپ تيراجىن قويماعا تاسىمالداعان جۇك كولىگىنەن "Swan Song: Diana، My Sister" اتتى مەمۋاردىڭ ءتورت داناسى جوعالعان. جۇرگىزۋشى تۇنگى ايالدامادان كەيىن كولىكتىڭ بۇزىلعانىن بايقاعان. ۇرلىق 22 قىركۇيەككە جوسپارلانعان كىتاپتىڭ رەسمي تۇساۋكەسەرى قارساڭىندا بولدى.
62 جاستاعى گراف سپەنسەر بۇل ەڭبەگىن سوڭعى وتىز جىلدا جازعان ون كىتابىنىڭ ىشىندەگى ەڭ جەكە باسىنا جاقىنى دەپ اتادى. ونىڭ ايتۋىنشا، مەمۋاردىڭ باستى ماقساتى — ديانا تۋرالى شىندىقتى اعاسىنىڭ كوزقاراسىمەن جەتكىزۋ جانە ونىڭ جادىن جىلدار بويى جينالعان بۇرمالاۋلار مەن جالعان قاۋەسەتتەردەن قورعاۋ.
باسىلىم وتباسىنداعى بىرلەسكەن ءومىر تۋرالى بالالىق شاق ەستەلىكتەرىن دە، 1997 جىلى پاريجدە ۋەلس پرينسەسساسى قازا تاپقاننان كەيىنگى قايعىلى كۇندەردى دە قامتيدى. باسپا جانە ەلەكتروندى نۇسقادان بولەك، كىتاپ سپەنسەردىڭ ءوزى وقىعان اۋديوجازبا تۇرىندە دە شىعادى.