قازاقستاندىق شابۋىلشى داستان ساتپايەۆ جەرلەستەرىنە قولداۋ كورسەتكەنى ءۇشىن العىس ءبىلدىردى. ونىڭ سۇحباتى «بەرنلي» كلۋبىنىڭ YouTube-ارناسىندا جاريالاندى.
«قايرات» تۇلەگى ماۋسىم ايىندا الماتىلىق كلۋبتان كەتىپ، اعىلشىندىق «چەلسيگە» اۋىسقان ەدى. ول لوندوندىقتار ساپىندا ماۋسىم الدىنداعى دايىندىقتان ءوتىپ، كەيىن ءبىر جىلدىق جالداۋ نەگىزىندە «بەرنليگە» جىبەرىلدى.
ەكى كلۋبتىڭ دا الەۋمەتتىك جەلىلەرىندە قازاقستاندىق جانكۇيەرلەر ساتپاەۆتى بەلسەندى قولدادى. «بەرنلي» ءباسپاسوز قىزمەتىنە بەرگەن سۇحباتىندا 18 جاستاعى فۋتبولشى ولارعا ارناپ جىلى لەبىزىن جەتكىزدى.
«مۇنداي قولداۋ ءۇشىن ۇلكەن راحمەت! „چەلسيدە“ ماۋسىم الدىنداعى دايىندىقتان ءوتىپ جۇرگەنىمدە، ولار ءار ويىندا، ءار جازبانىڭ استىندا مەنى قولداپ وتىردى. مەنىڭ وسىنداي تاماشا ادامدارىم بار ەكەنىنە قۋانىشتىمىن. مەن ولاردى جاقسى كورەمىن، ويتكەنى بۇل — مەنىڭ ەلىم. سولار ءۇشىن مەن ەۋروپالىق فۋتبولعا لايىقتى ەكەنىمىزدى دالەلدەيتىن بولامىن»، — دەدى ساتپايەۆ.
ول «بەرنلي» جانكۇيەرلەرىنىڭ دە قولداۋىن سەزىنەتىنىن اتاپ ءوتتى. فۋتبولشى كومانداعا چەمپيونشيپتەن انگليا پرەمەر-ليگاسىنا قايتا ورالۋعا كومەكتەسپەك.
«مەنىڭ اۋىسۋىما جانكۇيەرلەردىڭ قۋانىشتى ەكەنىنە وتە ريزامىن. ەندى ولارعا جانە وزىمە كلۋبتىڭ پرەمەر-ليگاعا قايتا ورالۋىنا كومەكتەسە الاتىنىمدى دالەلدەۋىم كەرەك. مەن مۇنى جاسايمىن»، — دەدى ساتپايەۆ.
قازاقستاندىق ويىنشى ازىرگە «بەرنلي» ساپىندا الاڭعا شىققان جوق. بۇل 23 تامىزدا، كوماندا چەمپيونشيپتىڭ ەكىنشى تۋرىندا «ۆەست برومۆيچپەن» قوناقتا ويناعاندا ورىن الۋى مۇمكىن. ماچ استانا ۋاقىتىمەن ساعات 16:00-دە باستالادى.
«مەن بۇل ءساتتى اسىعا كۇتەمىن. ەڭ جاقسى جاتتىعۋ — بۇل ويىن دەپ ويلايمىن. فۋتبولشىلار ءبىر اپتا بويى ءدال وسى ماچتى كۇتەدى. مەن دە دەبيۋتىمدى كۇتىپ ءجۇرمىن. ءبىز ءۇش ۇپاي الۋعا تىرىسامىز. جانكۇيەرلەرىمىزدىڭ قولداۋىمەن جەڭىسكە جەتەتىنىمىزگە سەنىمدىمىن»، — دەپ اتاپ ءوتتى ساتپايەۆ.
چەمپيونشيپتىڭ ءبىرىنشى تۋرىندا قازاقستاندىق ويىنشى «بەرنلي» وتىنىمىنە ەنبەدى. ونسىز كوماندا 0:2 ەسەبىنەن قالپىنا كەلىپ، «ۆەست حەممەن» ماچتا 2:2 ەسەبىمەن تەڭ وينادى.