18 جاستاعى قازاقستاندىق شابۋىلشى داستان ساتپايەۆ اعىلشىندىق «بەرنلي» ساپىندا چەمپيونشيپتىڭ «ۆەست برومۆيچ البيونعا» قارسى ويىنىندا تۇڭعىش رەت الاڭعا شىقتى. كەزدەسۋ ونىڭ جاڭا كومانداسىنىڭ 1:3 ەسەبىمەن جەڭىلۋىمەن اياقتالدى، دەپ حابارلايدى infohub.kz سايتى.
بيىل كوكتەمدە انگليا پرەمەر-ليگاسىنان ءتۇسىپ قالعان «بەرنلي» الدىنا ەليتالىق ديۆيزيونعا دەرەۋ قايتۋ ماقساتىن قويدى. ءبىرىنشى تۋردا نيكي حايەن شاكىرتتەرى اپل-دان دا ءتۇسىپ قالعان «ۆەست حەممەن» 2:2 ەسەبىمەن تەڭ وينادى.
ەكىنشى تۋردا «بوردوۆىە» «ۆەست برومۆيچكە» قوناققا باردى. 8-مينۋتتا-اق قوناقتاردىڭ جىلدام شابۋىلى كاللام ستايلستىڭ ءوز قاقپاسىنا سوققان اۆتوگولىمەن اياقتالدى. الايدا يەلەرى تەز ەسىن جيدى: 18-مينۋتتا گارري ۋيتۆەلل تەپە-تەڭدىكتى قالپىنا كەلتىردى، ال ەكىنشى تايمنىڭ باسىندا ايزەك پرايس «البيوندى» العا شىعاردى.
كەزدەسۋ بارىسىن وزگەرتۋگە ۇمتىلعان «بەرنلي» باپكەرلەر شتابى بىرنەشە اۋىستىرۋ جاسادى، سونىڭ ىشىندە داستان ساتپاەۆتىڭ شىعۋى دا بولدى. 57-مينۋتتا قازاقستاندىق جارتىلاي قورعانىستىڭ وڭ قاناتىندا دجوش لورەندى الماستىردى. الايدا 65-مينۋتتا-اق پرايس پەنالتيدەن گول سوعىپ، دۋبل جاساپ، تۇپكىلىكتى ەسەپتى 3:1 ەتىپ بەكىتتى.
وسىدان كەيىن ساتپايەۆ «بەرنليدىڭ» ەڭ بەلسەندى ويىنشىلارىنىڭ بىرىنە اينالدى، ويىندى ءوز موينىنا باتىل الدى جانە سەرىكتەستەرىنە الدىڭعى شەپكە بىرنەشە رەت پاس بەردى. الايدا «ۆەست ءبرومۆيچتىڭ» تىعىز قورعانىسى وعان تولىق اشىلۋعا مۇمكىندىك بەرمەدى. يەلەرى ەرىكتى جەڭىسكە جەتىپ، تۋرنير كەستەسىندە ەكىنشى ورىنعا كوتەرىلدى.
ەسكە سالايىق، ساتپاەۆتىڭ «قايراتتان» «چەلسيگە» اۋىسقانى 2025 جىلدىڭ اقپانىندا بەلگىلى بولدى. بونۋستاردى قوسقانداعى مامىلە سوماسى 4،3 ملن ەۋروعا باعالاندى. «اريستوكراتتارمەن» اۆستراليا مەن ازياداعى ماۋسىم الدىنداعى تۋرنەدە، داستان سيدنەيدە گول سوققان سوڭ، ول «بەرنليگە» ماۋسىمدىق جالعا بەرىلدى. 12 تامىزدا ءبىزدىڭ ۆۋندەركيندىمىز 18 جاسقا تولدى.