Қазақстан құрамасының шабуылшысы Дастан Сатпаев жамбас жарақатына байланысты Англияның «Бернли» клубының Чемпионшиптегі кезекті матчына өтінімге енбеді, деп хабарлайды infohub.kz сайты.
31 қазан, сенбі күні «бордоваялар» өз алаңы «Терф Мур» стадионында «Портсмутты» қабылдады. 13-тур аясындағы кездесу голсыз теңдікпен — 0:0 есебімен аяқталды. Бұл матч швейцариялық Фабио Челестинидің «Бернли» бас бапкері қызметіндегі дебюті болды.
Сатпаев ойын өтініміне енбеді. Клуб бұл жөнінде ресми түсініктеме бермегенімен, бұған дейін БАҚ-та футболшының жарақаты туралы ақпарат тараған. NUR.KZ дерегінше, сөз жамбастың артқы бетінің зақымдануы туралы болып отыр.
2 қыркүйекте Сатпаев жарақатқа байланысты ойыннан тыс қалып, 10 қазанда алаңға қайта оралған еді. Спорт комментаторы Ермұхамед Мәуленнің айтуынша, бұл жолы қалпына келуге кемінде алты апта қажет.
Осы себептен 18 жастағы шабуылшы Ұлттар лигасының қарашадағы матчтарына Қазақстан құрамасының түпкілікті құрамына енбеді, алайда бастапқыда кеңейтілген тізімге қосылған болатын.
«Бернли» «Портсмутпен» тең ойыннан кейін тоғыз ұпай жинағанымен, 22-орында қалып, яғни төменгі лигаға түсу аймағында тұр.