قازاقستاندىق تەننيسشى ەلەنا رىباكينا، ايەلدەر جەكە سىنىندا ەلدەگى ءبىرىنشى راكەتكا، الەمدىك رەيتينگتە كوش باستاۋعا ءبىر قادام قالدى، دەپ حابارلايدى infohub.kz.
سپورتشى جاپونيالىق ناومي وساكانى جەڭىپ، مانسابىندا العاش رەت اقش اشىق چەمپيوناتىنىڭ شيرەك فينالىنا شىقتى. ءتۋرنيردىڭ كەلەسى كەزەڭىندە رىباكينا پاريج-2024 وليمپياداسىنىڭ چەمپيونى، قىتايلىق چجەن سينۆەنمەن كەزدەسەدى.
شيرەك فينالدا ءساتتى ونەر كورسەتكەن جاعدايدا، قازاقستاندىق تەننيسشى باسقا قارسىلاستاردىڭ ناتيجەسىنە قاراماستان، WTA رەيتينگىنىڭ كوشىن باستايتىنىنا كەپىلدىك الادى. رەيتينگتىڭ رەسمي جاڭارتىلۋى US Open اياقتالعاننان كەيىن جۇزەگە اسادى.
«ارينە، مەن مۇنى قالايمىن. مۇنى قالامايتىن ەشكىمدى بىلمەيمىن. بۇل مەنىڭ ماقساتتارىمنىڭ ءبىرى. ءبىراق مەن بىرتىندەپ العا جىلجۋعا جانە قولىمنان كەلگەننىڭ ءبارىن جاساۋعا تىرىسامىن، ءاربىر كەلەسى ماچتا سوڭىنا دەيىن كۇرەسەمىن. نە بولاتىنىن كورەمىز. ەگەر مەن بۇگىنگىدەي جاقسى پوداچا جاساي السام، مەنىڭ بارلىق مۇمكىندىگىم بار دەپ ويلايمىن. مەن بار كۇشىمدى سالامىن. ءبارى مەنىڭ پايداما بولسا دەپ ۇمىتتەنەمىن»، — دەدى رىباكينا وساكانى جەڭگەننەن كەيىن الەمدىك رەيتينگتى باستاۋ مۇمكىندىگىن ءتۇسىندىرىپ.
ماۋسىمداعى سوڭعى ۇلكەن دۋلىعا ءتۋرنيرىنىڭ قورىتىندىسى بويىنشا كوشباسشىلىقتى بەلارۋستىك ارينا سوبولەنكو ساقتاپ قالۋى مۇمكىن. ول قازىرگى چەمپيون رەتىندە ماكسيمالدى 2000 رەيتينگتىك ۇپايدى قورعايدى. سونداي-اق الەمدىك ءبىرىنشى راكەتكا اتاعىنا امەريكاندىقتار دجەسسيكا پەگۋلا مەن كوكو گاۋفف تا ۇمىتكەر.