قازاقستاندىق تەننيسشى ەلەنا رىباكينا مانسابىندا العاش رەت ايەلدەر تەننيس قاۋىمداستىعىنىڭ (WTA) ءتىرى رەيتينگىندە ءبىرىنشى ورىنعا كوتەرىلدى، دەپ حابارلايدى infohub.kz سايتى.
اقش اشىق چەمپيوناتى الدىنداعى ۇپايلاردى قايتا ەسەپتەۋ ناتيجەسىندە رىباكينانىڭ ەنشىسىندە 7 911 ۇپاي بولدى. ول 6 585 ۇپايى بار بەلارۋستىك ارينا سوبولەنكونى باسىپ وزدى.
ايتا كەتەيىك، ءتىرى رەيتينگ الدىن الا بولىپ سانالادى جانە تۋرنيرلەر بارىسىندا وزگەرىپ وتىرادى. WTA رەسمي كلاسسيفيكاسياسىندا رىباكينا ازىرگە ەكىنشى ورىندا تۇر، ال الەمنىڭ ءبىرىنشى راكەتكاسى سوبولەنكو بولىپ قالا بەرەدى. دەگەنمەن، قازاقستاندىق تەننيسشى رەيتينگ تۋرالى ويلامايدى.
«مەن رەيتينگ تۋرالى مۇلدەم ويلاماۋعا تىرىسامىن جانە ماچتان ماچقا قاراي جىلجيمىن. ءقازىر مەن ءۇشىن ەڭ باستىسى — دەنساۋلىعىمدى ساقتاۋ»، — دەدى رىباكينا.
تەننيسشىلەردىڭ سوڭعى پوزيسيالارى US Open اياقتالعاننان كەيىن انىقتالادى. ەگەر قازاقستان وكىلى ءتۋرنيردىڭ كەم دەگەندە جارتىلاي فينالىنا جەتسە، ول قارسىلاستارىنىڭ ناتيجەلەرىنە قاراماستان، مانسابىندا العاش رەت رەسمي الەمدىك رەيتينگتە كوش باستايتىنىنا كەپىلدىك بەرىلەدى.
رىباكينانى الەۋەتتى تۇردە امەريكالىق دجەسسيكا پەگۋلا مەن كوري گاۋفف تە باسىپ وزا الادى. ول ءۇشىن ولار US Open-تە ءساتتى ونەر كورسەتۋى كەرەك، ال قازاقستاندىق تەننيسشى جارتىلاي فينالعا دەيىن جارىستان شىعىپ قالۋى ءتيىس.
نيۋ-يوركتەگى ءتۋرنيردىڭ ءبىرىنشى اينالىمىندا رىباكينا امەريكالىق تەيا فرودينمەن كەزدەسەدى. الدىڭعى كۇنى قازاقستاندىق تەننيسشى سينسينناتيدەگى تۋرنيردە العان اياق جاراقاتىنان ايىعىپ، قالپىنا كەلۋگە ۇمىتتەنەتىنىن مالىمدەدى.
WTA رەسمي پروفيلىندە رىباكينا ازىرگە الەمنىڭ ەكىنشى راكەتكاسى رەتىندە كورسەتىلگەن. سپورتشىنىڭ بۇعان دەيىنگى ۇزدىك ناتيجەسى دە ەكىنشى ورىن بولاتىن.