ەڭ ادەمى گۇل
باياعى وتكەن زاماندا ءبىر قالاشىقتا الەمنىڭ ەڭ سۇلۋ قىزى ءومىر ءسۇرىپتى. قىزدىڭ سۇلۋلىعى سونشالىق، ونى كورۋ ءۇشىن وتە الىس شاھارلاردان، ەلدەردەن وتە باي، اسقان كورىكتى، اسىل تەكتى جىگىتتەر كەلەدى ەكەن. ۇيلەنۋگە ۇسىنىس جاساعانداردىڭ، حانزادالاردىڭ، سەرىلەردىڭ بىرەۋىن دە ۇناتپاپتى.
سول كۇندەرى وسى ماڭدا تۇراتىن ءبىر جىگىت تە الگى قىزعا عاشىق بولىپ قولىن سۇراپتى. ءبىراق قىز ونىڭ دا ۇسىنىسىن قابىل ەتپەيدى.
ارادان ۇزاق جىلدار وتەدى. الگى جىگىت باسقا قالاعا كەتىپ، جاڭا ءومىر باستاپ، ۇيلەنىپ بالا-شاعالى بولادى. كۇندەردىڭ كۇنىندە بۇرىن ءوزى تۇرعان كىشىگىرىم قالاشىققا جولى تۇسەدى. كەلە جاتىپ جولدا ءبىر تانىسىن كەزدەستىرەدى. ونىمەن اڭگىمە بارىسىندا بۇرىڭعى ادەمى قىز ەسىنە ءتۇسىپ، ونىڭ جاعدايىنىڭ نە بولعانىن سۇرايدى. سوندا تانىسى گۇل باقشاسى بار ءۇيدى كورسەتىپ، قىزدىڭ تۇرمىسقا شىققانىن سول ۇيدە تۇرىپ جاتقانىن ايتادى. جىگىت: «اپىر-اي، كەزىندە ەشكىمگە قاراماعان بۇل قىزدىڭ كۇيەۋى كىم بولدى ەكەن؟» دەپ، تاڭىرقاي باستايدى.
ءبىر كۇنى جاسىرىن سىعالاپ ءجۇرىپ، كۇيەۋىنىڭ ۇيدەن شىعىپ بارا جاتقانىن كورەدى. قىزدىڭ كۇيەۋى سەمىز، باسى تاز، ءتۇرى دە وتە ۇسقىنسىز بىرەۋ ەكەن. ونىڭ ۇستىنە باي دا ەمەس ەكەن. مۇنىڭ ءمانىسىن بىلگىسى كەلگەن الگى جىگىت كۇيەۋى كەتكەن سوڭ ءۇيدىڭ ەسىگىن قاعادى. قىز ەسىكتى اشقاندا، ءوزىنىڭ كىم ەكەنىن ايتىپ، نە ءۇشىن مۇنداي ادامعا ۇيلەنگەنىن سۇرايدى. قىز وعان: «اناۋ تۇرعان گۇل باعىنىڭ ىشىنەن ەڭ ادەمى گۇلدى ءۇزىپ اكەلسەڭ، جاۋابىن ايتامىن. ءبىراق، ءبىر عانا شارتىم بار. ادەمى گۇلدى الۋ ءۇشىن ىلگەرىلەي الاسىڭ ءبىراق كەرى شەگىنبەيسىڭ!» دەيدى.
جىگىت جۇزدەگەن ادەمى گۇلدەردىڭ ىشىنە كىرىپ ارالاي باستايدى. بىردەن كوزىنە وتە ادەمى ءبىر سارى گۇل تۇسەدى. ونى ەندى الايىن دەپ جاتقاندا ءسال ىلگەرىدە قىزىل-الا گۇل كوزىنە تۇسەدى. وعان بارىپ قولىن سوزا بەرگەندە ودان دا ىلگەرىدە وتە كەرەمەت قىزىل گۇل شوعىن كورەدى.
وسىلاي ەڭ ادەمى گۇلدى تابامىن دەپ ىلگەرىلەپ جۇرە كەلە باقشانىڭ سوڭىنا دا جەتەدى. كەرى شەگىنە الماعان جىگىت امالسىزدان سول جەردەن ءبىر گۇلدى ءۇزىپ، قىزعا الىپ بارادى. باقشانىڭ ەڭ ادەمى گۇلىن كۇتىپ وتىرعان قىز جاپىراقتارى سولىڭقى، ءوڭسىز گۇلدى اكەلگەنىن كورەدى.
سوندا قىز جىگىتكە بۇرىلىپ بىلاي دەيدى: «كوردىڭ بە؟ ۇنەمى ەڭ جاقسىسىن تابۋدى قالاعانىڭدا ءومىرىڭنىڭ قالاي ءوتىپ كەتكەنىن بىلمەي قالاسىڭ. سوڭىندا ەڭ جامانىنا دا رازى بولۋعا ءماجبۇر بولاسىڭ. سوندىقتان جاستىق شاعىڭ قولدان كەتپەي تۇرىپ قولدا باردىڭ ءقادىرىن ءبىلۋ كەرەك.»
You Might Also Like
-
كەز كەلگەندى مۇيىزدەي بەرەتىن سۇزەگەن بۇقا بايقاۋسىزدا قۇدىققا ءتۇسىپ كەتىپتى. قۇدىقتىڭ ءىشىن بار پەرمەنىمەن سۇزگىلەپ، توپىراعىن اينالعانىن، ءوزىنىڭ بەكەردەن-بەكەر ولەرىن بۇقا ءبىلىپتى. بىرەۋ بولماسا، ...
-
قاعازدىڭ ميكروسكوپيالىق تالشىقتارىنىڭ جانە ساۋقساق تەرىسىنىڭ سەزىمتال رەسەپتورلارىنىڭ كەسىرىنەن ساۋساقتى قاعازبەن كەسىپ الۋ، باسقا زاقىمدانۋلارعا قاراعاندا الدەقايدا جانعا باتادى.
