قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى سۋبسيديالاناتىن جۇمىس ورىندارىن ۇيىمداستىرۋ قاعيدالارىن جاڭارتتى. ەندى نەگىزگى كەزەڭدەر — جۇمىس بەرۋشىلەردىڭ وتىنىمدەرىن قابىلداۋدان ازاماتتاردى بوس جۇمىس ورىندارىنا جولداۋعا جانە قۇجاتتاردى تەكسەرۋگە دەيىن — ەلەكتروندىق ەڭبەك بيرجاسى ارقىلى جۇزەگە اسىرىلادى، دەپ حابارلايدى infohub.kz سايتى.
بۇرىنعىداي، سۋبسيديالاناتىن جۇمىس ورىندارىن مانساپ ورتالىقتارى جۇمىس بەرۋشىلەردىڭ وتىنىمدەرى نەگىزىندە ۇيىمداستىرادى. قاتىسۋعا جەكە مەنشىك نىسانىنداعى كوممەرسيالىق كومپانيالار، جەكە كاسىپكەرلەر، شارۋا جانە فەرمەر قوجالىقتارى، الەۋمەتتىك كاسىپكەرلەر، مەملەكەتتىك مەكەمەلەر جانە ولاردىڭ ۆەدومستۆولىق باعىنىستاعى ۇيىمدارى، كۆازيمەملەكەتتىك سەكتور سۋبەكتىلەرى، سونداي-اق ۇكىمەتتىك ەمەس ۇيىمدار قاتىسا الادى.
بارلىق جۇمىس بەرۋشىلەرگە ءبىرىڭعاي تالاپتار بەلگىلەنگەن: ۇيىم 12 ايدان استام جۇمىس ىستەۋى ءتيىس، بانكروتتىق راسىمىندە بولماۋى كەرەك، ەكسترەميزمگە قارسى ءىس-قيمىل سالاسىنداعى زاڭنامانى ساقتاۋى جانە جۇمىسپەن قامتۋعا جاردەمدەسۋ شارالارى اياسىندا بۇرىن جاسالعان شارتتاردى ورىنداۋى قاجەت.
سۋبسيديالاناتىن جۇمىس ورىندارى جان باسىنا شاققانداعى مەملەكەتتىك تاپسىرىس، ينفراقۇرىلىمدىق مەملەكەتتىك ساتىپ الۋ نەمەسە ارناۋلى الەۋمەتتىك قىزمەتتەر كورسەتۋ باعدارلامالارى بويىنشا بيۋدجەتتىك قارجىلاندىرۋ الىپ جاتقان جۇمىس بەرۋشىلەردە قۇرىلمايدى. ەڭبەك مينيسترلىگىندە بۇل بيۋدجەتتەن بىردەي شىعىنداردى قايتالاپ قارجىلاندىرۋدى بولدىرماۋ ءۇشىن قاجەت ەكەنىن ءتۇسىندىردى.
سۋبسيديالاناتىن جۇمىس ورىندارىنىڭ سانى جۇمىس بەرۋشىنىڭ ساناتىنا بايلانىستى. رەسپۋبليكالىق ماڭىزى بار قالالارداعى ۇكىمەتتىك ەمەس ۇيىمدار ءۇشىن بىردەن ونعا دەيىن قاتىسۋشى، ال وڭىرلەردە بىردەن بەسكە دەيىن قاراستىرىلعان. بۇل رەتتە ۇەۇ رەسمي دەرەكقوردا تىركەلگەن بولۋى ءتيىس.
كوممەرسيالىق ۇيىمدار، جەكە كاسىپكەرلەر، شارۋا قوجالىقتارى جانە الەۋمەتتىك كاسىپكەرلەر بىردەن بەسكە دەيىن سۋبسيديالاناتىن جۇمىس ورنىن قۇرا الادى. قاتىسۋ ءۇشىن ولاردىڭ جالاقى بويىنشا بەرەشەگى بولماۋى، سوڭعى ءبىر جىل ىشىندە الەۋمەتتىك تولەمدەردى تۇراقتى جۇزەگە اسىرۋى جانە باعدارلامانىڭ الدىڭعى كەزەڭدەرىندەگى قاتىسۋشىلاردى تۇراقتى جۇمىسقا ورنالاستىرۋى قاجەت.
مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى ءۇشىن دە بىردەن بەسكە دەيىن جۇمىس ورنى قاراستىرىلعان.
اۋىلدىق اكىمدىكتەر مەن كوممۋنالدىق كاسىپورىندار ءۇشىن جەكە ءتارتىپ بەلگىلەنگەن. ولار ءۇشىن سۋبسيديالاناتىن جۇمىس ورىندارىنىڭ سانى اۋىل تۇرعىندارىنىڭ سانىنا بايلانىستى بولادى جانە جالپى تۇرعىندار سانىنىڭ 2%-دان 5%-ىنا دەيىن قۇرايدى.
جۇمىس بەرۋشىلەردى ىرىكتەۋ، ازاماتتاردى جۇمىس ورىندارىنا جولداۋ جانە قۇجاتتاردى تەكسەرۋ ەندى ەلەكتروندىق ەڭبەك بيرجاسى ارقىلى ەلەكتروندى فورماتتا وتەدى. مينيسترلىك سيفرلاندىرۋ قاعاز قۇجات اينالىمىن قىسقارتادى، وتىنىمدەردى قاراۋدى جىلدامداتادى جانە پروسەستى اشىق ەتەدى دەپ كۇتەدى.
بۇعان دەيىن «كۋرسيۆ» 2026 جىلدىڭ باسىنان بەرى 50 جاستان اسقان 10 مىڭعا جۋىق جۇمىسسىز قازاقستاندىق «كۇمىس جاس» جوباسى بويىنشا جۇمىسقا ورنالاسقانىن جازعان بولاتىن. باعدارلاما اياسىندا مەملەكەت قاتىسۋشىلاردىڭ جالاقىسىن ءىشىنارا سۋبسيديالايدى، ال جۇمىس بەرۋشىلەر سۋبسيديالاۋ كەزەڭى اياقتالعاننان كەيىن ولارعا تۇراقتى جۇمىس ورنىن بەرۋگە مىندەتتى.