Кофеині жоқ кәдімгі өнімдермен салыстырғанда, құрамында стимулятор бар сусындар мен қоспалар жүрек тоқтауы туралы хабарламаларда 11 есе жиі кездесті. Бұл туралы ScienceDaily жазған зерттеу деректеріне сілтеме жасай отырып, infohub.kz сайты хабарлайды.
Мамандар АҚШ-тың Азық-түлік және дәрі-дәрмек сапасын қадағалау басқармасының (FDA) дерекқорына 2017 жылдан 2025 жылға дейін түскен, тағам мен биологиялық қоспалардан болатын жанама әсерлер туралы 28 345 ерікті шағымды талдады. Оның 854-і энергетиктер мен стимуляторларға қатысты болған.
Бұл есептерде жүрек ұстамасы кәдімгі газдалған сусын, витамин немесе протеин батончиктеріне қатысты шағымдармен салыстырғанда 4,5 есе жиі, ал қарынша аритмиясы — жүректің төменгі қуыстары ырғағының бұзылуы — шамамен төрт есе жиі аталған. Мұндай оқиғалардың шамамен 45%-ы 18 бен 34 жас аралығындағы адамдарға тиесілі.
Жұмыстың авторы, Вирджиния университетінің медицина студенті Сай Самаямантула энергетиктер кәдімгі судың жанында сатылатынын, сондықтан көпшілік оларды толық қауіпсіз деп санайтынын атап өтті. Алайда мұндай сусындарды үнемі ішу кофеиннің тәуліктік ұсынылатын 400 миллиграмм мөлшерінен оңай асып кетуге мүмкіндік береді. АҚШ-та энергетиктер дәрі емес, тағам ретінде реттеледі, сондықтан нарыққа шығар алдында міндетті клиникалық тексеруден өтпейді.
Сонымен қатар ғалымдар зерттеу тікелей себеп-салдар байланысын дәлелдемейтінін атап өтті. FDA дерекқоры ерікті хабарламалар негізінде құрылады және онда асқыну туындамаған сау тұтынушылардың жалпы саны ескерілмейді. Өзін нашар сезінуге жасырын аурулар, қарқынды жаттығулар немесе сусындарды алкогольмен араластыру да әсер етуі мүмкін.
Америка кардиология қауымдастығының сарапшылары қосымша зерттеулер жүргізу және құрамында стимулятор концентрациясы жоғары өнімдерді қатаңырақ бақылау қажеттігін мәлімдеді.