وڭتۇستىك افريكانىڭ تۇڭعىش قارا ءناسىلدى ات سپورتى چەمپيونى، تاجىريبەلى اتبەگى ەنوس مافوكاتە 80 جاسىندا دۇنيەدەن وزدى. بۇل تۋرالى ونىڭ وتباسى بەيسەنبى كۇنى مالىمدەدى، دەپ حابارلايدى infohub.kz سايتى.
مافوكاتە اپارتەيد جىلدارىندا تەك اق ءناسىلدى شاباندوزدار ۇستەمدىك ەتكەن سپورت تۇرىندە ناسىلدىك كەدەرگىلەردى بۇزعان تۇلعا رەتىندە تانىمال بولدى. ونى حالىق "Kgosi ya Dipere" — سەسوتو تىلىندە "جىلقىلار پاتشاسى" دەپ اتاعان.
وتباسىنىڭ مالىمدەمەسىندە: "ونىڭ جولى وڭتۇستىك افريكانىڭ ات سپورتىنداعى بىرنەشە جەتەكشى تۇلعالاردىڭ ارقاسىندا قالىپتاستى. ولار ونىڭ ەرەكشە قابىلەتىن تانىپ، سول كەزدەگى ناسىلدىك كەدەرگىلەرگە قارسى تۇرۋىنا ماڭىزدى ساتتەردە قولداۋ كورسەتتى"، — دەلىنگەن.
مافوكاتە اتقورادا جۇمىس ىستەۋدەن باستاعان. ول 1963 جىلى العاشقى ات جارىسىندا جەڭىسكە جەتكەن، الايدا ەلدەگى سەگرەگاسيا زاڭدارى وعان 1975 جىلعا دەيىن باسقا جارىستارعا قاتىسۋعا تىيىم سالعان. 1980 جىلى ول حالىقارالىق دەڭگەيدە سايىسقا تۇسكەن تۇڭعىش قارا ءناسىلدى وڭتۇستىكافريكالىق اتاندى — ۋەمبليدەگى كورولدىك حالىقارالىق ات كورمەسىندە 31 شاباندوزدىڭ ىشىنەن بەسىنشى ورىندى يەلەندى.
1991 جىلى اپارتەيد جويىلىپ، حالىقارالىق وليمپيادا كوميتەتى وڭتۇستىك افريكانى وليمپيادا ويىندارىنا قايتا قابىلداعاننان كەيىن، ونىڭ ەڭبەگى ەلەنىپ، 1992 جىلى بارسەلوناداعى وليمپياداعا سپورت ەلشىسى رەتىندە باردى. وتباسىنىڭ ايتۋىنشا، "ونىڭ جولى اپارتەيدتىڭ اۋىر شىندىعىنان حالىقارالىق دەڭگەيدەگى سايىستارعا دەيىن جەتتى. الايدا ونىڭ ءومىرىنىڭ ءمانى ارەناداعى جەتىستىكتەرىنەن الدەقايدا تەرەڭىرەك ەدى".
سوڭعى جىلدارى ول سوۋەتو قالاشىعىنداعى جاس قارا ءناسىلدى شاباندوزداردى دايارلاۋمەن اينالىستى. ول 2006 جىلى قۇرعان سوۋەتو ات سپورتى ورتالىعىندا جۇزدەگەن جاستى اتقا مىنۋگە جانە جانۋارلارعا كۇتىم جاساۋعا ۇيرەتتى. 2015 جىلى وڭتۇستىك افريكانىڭ سپورت سىيلىقتارىندا ول ءومىر بويى جەتىستىكتەرى ءۇشىن ماراپاتقا يە بولدى.